اسلام آباد۔ 21 جولائی (اے پی پی) قومی ادارہ جان جوڑی پارینے کہ مچ آملک اٹی تدوک آ 24 گھنٹہ ٹی کورونا نا 21 ہزار 315 ٹیسٹ کننگا ہرافتے ٹی 599 نا رپورٹ مثبت بس۔ تدوک آ 24 گھنٹہ ٹی مثبت کیس آتا کچ 2.81درسد ئسک، قومی ادارہ جان جوڑی نا حساب وکتاب نا رداٹ مچ آ ملک اٹی کورونا دین انا 170 ناجوڑ آتا حالیت نازرک ءِ۔ تدوک آ 24 گھنٹہ ٹی کورونا دین آن 3 بندغ زوال کریر۔ مچ آ ملک اٹی کورونا کیس آتا غٹ آن زیات کچ حیدر آباد اٹی ریکارڈ کننگا۔ حیدر آباد اٹی بیست ءُ چار گھنٹہ ٹی کیس آتا کچ 36.84 درسد اسکان سرمس وخت اس کہ لاہور اٹی 5.86 درسد، گلگت اٹی کیس آتا کچ 4.47 درسد ریکارڈ کننگا۔ پشاور اٹی کیس آتا کچ 2.84 درسد ، کراچی ٹی 2.87 درسد، مردان اٹی 3.33 درسد، اسلام آباد اٹی 1.88 درسد، نوشہرہ ٹی 5.00 درسد، فیصل آباد اٹی 2.07 درسد، صوابی ٹی 25.00 درسدریکارڈ کننگا۔