احسن اقبال نا امریکی خصوصی نمائندہ واپاری و کاروباری امور و کانگرس نا باسک آتون اوڑدہی، پاک امریکہ تعلقداری، چاگڑدی بدلی و جموں و کشمیر نا حالیت آتیا گپ وتران

واشنگٹن۔ 20 جولائی (اے پی پی) بنجائی وزیرڈٹ بندی شونداری واصلاحات و خصوصی گام گیج احسن اقبال چارشنبےنادے آ امریکی خصوصی نمائندہ واپاری و کاروباری امور دلاور سید تون واشنگٹن اٹی اوڑدہی کرے۔ اودورہ ٹی کانگرس نا باسک و سینیٹر آتون ہم جتا جتا اوڑدہی کرے۔ واشنگٹن آن جاری بیان نا رداٹ بنجائی وزیر کانگرس باسک رینڈی ویبر، شیلا جیکسن  ولیزامیک لین تون جتا جتا اوڑدہی کرے۔ اوداوخت آ سینیٹر شیروڈبراؤن و سینیٹر کرس ون ہولن تون ہم اوڑدہی کرے۔ دا اوڑدہی تیٹی احسن اقبال پاک امریکہ تعلقداری تے پین سوگو کننگ نا اہمیت آ زور شاغا، تعلیم، جان جوڑی ، کشت وکشار ، ٹیکنالوجی ، آئی ٹی و چاگڑدی بدلی نا بشخ آتیٹی کمکاری ءِ مون آ دننگ نا بابت گپ وتران کرے۔ امریکی سینیٹرز و کانگرس باسک آتون گپ وتران اٹی احسن اقبال پارے کہ پاکستان وامریکہ علاقائی و جہانی امن اٹی شریدار ءُ۔ اوپاک امریکہ تعلقداری تا رداٹ ہڑتوم آ ملک آتا نیام اٹ واپاری تعلقداری، زرکاری نا مون آ دننگ آ خصوصی زور شاغا ، چاگڑدی بدلی نا بابت گپ وتران کرسا پارے کہ کاربن فٹ پرنٹ اٹی پاکستان نا بشخ بھاز کم ءِ ولے پاکستان چاگڑدی بدلی آن غٹ آن زیات زہمی مروک آ ملک آتیٹی اوار ءِ۔ اوپارے کہ پاکستان چاگڑدی بدلی نا چیلنج آتا مون ءِ توننگ کن امریکہ تون کمکاری نا خواہندار ءِ۔ یوکرین نا حالیت آتیٹی گلوبل چین اٹی اڑاند آن ودی مروک آ ویل آتیا ہیت کرسا اوپارے کہ ساڑی حالیت آتیٹی پد تموک ملک آتے جہانی برادری نا چکار نا سخت گرج ءِ تانکہ دا منفی زہم تے کم کننگ مرے۔ وزیر ڈٹ بندی دا اوڑدہی تیٹی بھارت نا غیر کانودی کوزہ گیری ٹی جموں وکشمیر نا حالیت و خاص وڑاٹ ہموڑے کمیونیکیشن آ خلوک پابندی و بھارتی فوج انا کنڈآن کشمیری الس نا حق انا خلاف ورزی تے تالان کرے۔ اوداہیت آ زور شاغا کہ امریکہ، جہانی برادری و انسانی حق انا تنظیمک داحالیت آتا نوٹس ءِ ہلیر۔