اسلام آباد۔ 20 جولائی (اے پی پی) بنجائی وزیر ہاؤسنگ اینڈ ورکس مولانا عبدالواسع پارینے کہ مستین نا حکمرانک ملک ءِ بھسکاری آن دوچار کریر، ملک انا خراب زرگزرانی حالیت آتا زموار مسکوہی حکمرانک ءُ، بنجائی حکومت تینا آئینی مد ءِ پورو کیک، پنجاب نا گچین کاری تون بنجائی حکومت نا ہچ ءُ کاریم اس اف، جمعیت علمائے اسلام بنجائی حکومت نا سیوتی ءِ، و سیوتی مننگ نا ناطہ ہر فیصلہ ءِ امنا کینہ۔ جمعیت علمائے اسلام نا سینئر باسک آتون گپ وتران کرسا بنجائی وزیر ہاؤسنگ اینڈ ورکس و جمعیت علمائے اسلام بلوچستان نا صوبائی امیر مولانا عبدالواسع پارے کہ جمعیت علمائے اسلام نا اولیکو دے آن خواست ئس کہ بنجائی حکومت تینا مد ءِ پورو کے انتئے کہ ہراتم اسکان حکومت تینا مد ءِ پورو کپک ہمووخت اسکان ملک انا حالیت سہی مننگ کپک ہراتم اسکان جمہوری حکومت اس تینا مد ءِ پورو کپک ہمووخت اسکان ملک انا زرگزرانی حالیت ہم سہی مننگ کپک ہنداخاطرآن پی ڈی ایم نابود و سلیکٹڈ حکومت ءِ چٹفے انتئے کہ عمران نیازی نا دور حکومت اٹ ملک انا حالیت خراب مسوسس و سری لنکا کون آ حالیت ودی مسوسس ولے نن مشکل حالیت آتیٹی سخت فیصلہ کرسا حالیت آتا گچینی کن گام گیج کرین و داسہ ملک انا زرگزران گچین مسنے۔ عمران نیازی اسہ وار ولدا ایلوفتا اشارہ غاتیا ملک انا زرگزرانی حالیت آتے خراب کننگ نا کوشست کننگ ءِ نن ملک انا شونداری و شونہالی ءِ خوانہ۔ اوپارے کہ زوت گچین کاری تا ضمنی گچین کاری تون ہچ ءُ تعلق اس مفک دا 20 سیٹ پی ٹی آئی نا ئسر ہرافتیان او 15 سیٹ دوئی کرے۔ اوپارے کہ الیکشن کمیشن آ عمران نیازی نا اعتراض سمجھ آن پیشن ءِ، الیکشن کمیشن جمہوری حقدار نا خیال ءِ تخا و او ساف و شفاف گچین کاری کرسا دا پک کرے کہ ساڑی حکومت الیکشن کمیشن نا باندات آتیٹی نیام تمپک۔
