اقوام متحدہ۔ 20 جولائی (اے پی پی) پاکستان اقوام متحدہ غا زور شاغانے کہ او بھارت نا غیر کانودی کوزہ گیری ٹی جموں و کشمیر اٹی چناتا حالیت زار آ چکار کے انتئے کہ بھارتی کوزہ گیر فوج چناتا برخلاف خوفناک ڈوہ انا ارتکاب کننگ ءِ۔ اقوام متحدہ ٹی پاکستان نا آخبتی مندوب منیر اکرم تدوک آ دے سلامتی کونسل اٹی ’’چناک و سلہہ ئی جھیڑہ‘‘ نا سرحال آ اڈ ہلوک سالانہ شرہ ٹی پارے کہ بھارت نا غیر کانودی کوزہ گیری ٹی جموں و کشمیر اٹی چنا و ورناتے ہڑدے دزگیر کننگک و اوفتے تشدد و ناروا سلوک نا شست کننگک تانکہ اودیم معلومداری دوئی کننگ تون اوار اوار اوفتیان دا حق خودارادیت کن جہد کروک آ ٹولی تا تعلق ان جبرا اعتراف ءِ کننگ کیر ہرانا سلامتی کونسل تینا قرارداد آتیٹی کشمیری تتون قول کرینے۔ اوپارے کہ دنیا دا وخت آ بیک وخت کورونا نا دین و پوسکن آ جھیڑہ، خور، ایندھن و مالیاتی ہلہلہ ئی حالیت آتاگواچی ءِ و داحالیت آتیٹی دا پیدوار ءِ کہ ننے تینا چناتا رکھ، راجی آسراتی و شونہالی ءِ پک کننگ کن مستی کاریم کروئی ءِ۔ داکان مست چنا و سلہہ ئی جھیڑہ غاتا بابت اقوام متحدہ نا سیکرٹری جنرل نا خصوصی نمائندہ ورجینیا گیمبا سیکرٹری جنرل نادا بابت رپورٹ ءِ جاری کرسا پارے کہ تدوک آ سال اٹی چناتا زیات کچ ءِ بدسلوکی نا شست کننگا۔ پاکستانی مندوب منیر اکرم سیکرٹری جنرل نا رپورٹ نا حوالہ ءِ تس ہراٹی بھارتی حکومت آ زور شاغنگا کہ او بھارت نا غیر کانودی کوزہ گیری ٹی جموں و کشمیر و بھارتی زندان تیٹی غیرکانودی حراست، پیلٹ گن آتا کاریم اٹ اتنگ ءِ توننگ تون اوار چناتا رکھ اکن گام گیج کے۔ اوپارے کہ بھارت نا غیر کانودی کوزہ گیری ٹی جموں و کشمیر نا خصوصی حیثیت نا چٹفنگ کن بھارت نا 5 اگست 2019 نا غیرکانودی وڑاٹ منظور کروک کانود آن پد 9 لکھ بھارتی فوجیک علاقہ نا محاصرہ ءِ کرینو ہرافک کم و ود 13 ہزار کشمیری چنا و ورناتے جبری وڑاٹ دزگیر کریر۔ اوپارے کہ بھارتی فوج انا داوڑنا خوفناک ڈوہ تا لڑ بھاز مرغن ءِ۔
