واشنگٹن۔ 20 جولائی (اے پی پی) امریکی محکمہ خارجہ اُرائی کہول آ سمگلنگ نا برخلاف کارروائی تیٹی گچینی بننگ آ پاکستان ءِ اپ گریڈ کرسا ’’واچ لسٹ‘‘ آن و چائلڈ سولجرز پریونشن ایکٹ (سی ایس پی اے) نا لڑ آن کشانے۔ امریکی محکمہ خارجہ تینا ٹریفکنگ ان پرسنز 2022(ٹی آئی پی) رپورٹ ءِ جاری کرینے ہراٹی انسان تا اُرائی کہول آ سمگلنگ نا برخلاف کارروائی نا خواست کننگانے، دارپورٹ اٹی پاکستان ءِ ٹیئر 2’’واچ لسٹ ‘‘ آن ٹیئر 2 ٹی اپ گریڈ کننگانے۔ 2021 اٹی 188ملک آتا کارکڑد آ رپورٹ اٹی پاننگاسس کہ حکومت پاکستان انسانی سمگلنگ نا چٹفنگ کن کم از کم آب آتیا پورو سلنگ کن اہم کوشست کننگ ءِ۔ امریکی وزیر خارجہ اینٹونی بلنکن سے شنبے نادے آ محکمہ خارجہ ٹی اسہ دود اسے ٹی رپورٹ جاری کرے۔ ٹیئر 2 اٹی ہمو ملک آتے اوار کننگا ہرافتا حکومت آک ٹی وی پی اے (ٹریفکنگ و کسٹمز پروٹیکشن ایکٹ) نا کم از کم آب آتیا پورو وڑٹ پورو سلپسہ ولے او تینے دا آب آتا رداٹ اتنگ کن اہم کوشست کننگ ءُ۔ پاکستان ملکی سمگلنگ نا کچ آ پدریسہ ٹیئر 2 ٹی ساڑی ءِ، ولے اودے ’’واچ لسٹ ‘‘ آن کشنگانے ، ہرا اسہ انتباہ سے آنبار ءِ کہ پین پیش رفت مفننگ نا حالیت اٹ و ٹیئر 3 اسکان ہِننگ نا دروشم اٹ، پابندی خلنگک۔ رپورٹ اٹی پاننگا، حکومت (پاکستان) تدوک آ رپورٹنگ نا مد انا مقابلہ ٹی جم وڑٹ زیات کوشست کرے، کوویڈ۔ 19 نا دین انا اثرآتے ہرسا انسداد سمگلنگ نا لائخی تے گچین کننگ نا کوشست آتیکن پاکستان ءِ ٹیئر 2 اٹی اپ گریڈ کننگانے۔ رپورٹ نا رداٹ دا کوشست آتیٹی 2018 پرسنز سمگلنگ نا توننگ ایکٹ (پی ٹی پی اے) نا رداٹ جاست وپاست اٹی گچینی، مقدمہ و سزا اوار ءُ۔ حکومت (پاکستان) زیات زہمی تے رکھ انا خذمت کن ریفر کرے۔ صوبائی محکمہ غاک زہمی تا درستی راستی و حوالہ تننگ کن آب اٹ آپریٹنگ وڑوڈول (ایس او پیز) نا نفاذ اٹی ودکی کریر و مستی اسٹیک ہولڈر آتے تربیت تسر، حکومت نیشنل ایکشن پلان (این اے پی ) آ عملدرآمد کن وسیلہ جتا کر ے و پی ٹی پی اے ٹی ترمیم کرے تانکہ دا دفعہ غاتے چٹفنگ مرے ہرا زالبول و چناتتون جنسی سمگلنگ نا ڈوہ اکن قید انا بدلہ جرمانہ نا موکل ایتک۔ داکان بیدس پاکستان ءِ چائلڈ سولجرز پریونشن ایکٹ (سی ایس پی اے ) نا لڑ آن ہم کشنگانے۔
