اسلام آباد۔ 20 جولائی (اے پی پی) چین اٹی پاکستان نا سفیر معین الحق پارینے کہ ٹیکنالوجی نا چینی ادارہ غاک پاکستان آ برسا کاروبار و زرکاری کن حکومت نا کنڈآن تروک آ آسودہی تیان فائدہ ہرفر۔ داخیال آتا درشانی ءِ او چائنا پاکستان ٹیکنالوجی انویسٹمنٹ کانفرنس نا بشخ ہلوک آتیان تران کرسا کرے۔ کانفرنس نامہمانداری ءِ اسپیشل ٹیکنالوجی زون اتھارٹی (ایس ٹی زیڈ اے) بیجنگ اٹی پاکستانی سفارت خانہ نا کمک اٹ کرے۔ معین الحق پارے کہ پاکستان خصوصی اقتصادی و ٹیکنالوجی زون تیٹی چینی صنعت و مینو فیکچرنگ یونٹ آتا جوڑ کننگ ءِ مون آ دننگ ءِ و اوفتا مصنوعات آتا برآمد کن آسراتی فراوان کننگ ءِ۔ سفیر پارے کہ پاکستان نا ورنا آبادی چینی کمپنی تیکن کسبکار افرادی قوت و وارخواہی فراوان کیک۔ اوپارےکہ پاکستان چینی کمپنی تیکن نیامی ایشیا، دے ٹک نیامی و اوکان پد افریقہ تون کاروبار کننگ کن اسہ اہم علاقائی مرکز اسے نا وڑاٹ ہم کاریم کننگ کیک۔ اونا پاننگ ئس کہ چینی ادارہ غاتے تینا کاروبار اس جوڑ کننگ کن خصوصی آسودہی و خراج اِلنگ تون اوار اوار ایلو آسراتی تے ہم تننگ انگ ءِ۔ سفیر چندی چینی ٹیکنالوجی کمپنی خاص وڑاٹ ہواوے نا ساڑی گری نا ذکر ءِ کرے ہرافتا پاکستان تون بھاز متکن ءُ تعلق و اہم ءُ کاروبار اسے۔
