کوئٹہ۔ 20 جولائی (اے پی پی) چیف آف ساراوان مسکوہی وزیراعلیٰ بلوچستان صوبائی اسمبلی نا باسک نواب محمد اسلم خان رئیسانی تون جمعیت علماء اسلام نا باسک حافظ عبدالوحید ابابکی نا کماشی ٹی ڈل چارشنبے نادے آ اوڑدہی کرے۔ داوخت آ ڈل مستونگ ءِ تفتان روڈ اتون ملفوک آ اہم سڑک آ صدیق آباد نا علاقہ ٹی پول مفننگ نا نوٹس ہلنگ و پول اس جوڑ کننگ نا پڑو آ اونا است انا حب اٹ منت واری ءِ ہرفیر۔ چیف آف ساراوان نواب محمد اسلم خان رئیسانی پارے کہ غٹ آن مست دا جاگہ غا پول اس جوڑ کننگک تانکہ پِر ونوکاپ نا دروشم اٹ مسافر آتے تکلیف تون مون تروئی تمپ اوکان پد سڑک اس جوڑ کننگ نا کاریم نا بناءِ کننگک، نواب محمد اسلم خان رئیسانی پارے کہ دا اہم روڈ ءِ مستونگ آن تفتان روڈ ، شیخ واصل اسکان جوڑ کننگ و اودے این ایچ اے تون گنڈنگ کن گام گیج کننگک تانکہ دا سڑک آن الس پبی فائدہ ہرفنگ کے، یات سلے دا اہم سڑک آن نوشکی ، خاران، دالبندین و تفتان اسکان الس سفر کیک انتئے کہ گونڈ وخت اٹی داکان مخلوق تینا مزل آ سرمننگ کیک۔ داوخت آ او جمعیت علماء اسلام نا ضلعی نائب امیر ڈاکٹر فیصل منان نا کنڈآن ایکسیئن پی ایچ ای سید عارف شاہ نا سلاہ کروک صدیق آباد کن آبنوشی اسکیم نا دستاویز آتے اوفتا دوٹی تس و اوڑآن خواست کرے کہ صدیق آباد کن بور اسے نا منظوری ءِ تننگے، صوبائی اسمبلی نا باسک نواب محمد اسلم رئیسانی پارے کہ فنڈ انا دوئی مننگ نا حالیت اٹ بور اس ہم خلنگک۔ اوکان گڈ او دستاویز آتے نوابزادہ میر رئیس رئیسانی نا دوٹی تس۔ جمعیت علماء اسلام نا ڈل انا کنڈآن ویل آتے جوانی اٹ بِننگ و اوفتا ایسری کن گام گیج آتیا نواب محمد اسلم خان رئیسانی ونوابزادہ میر رئیس رئیسانی نا منت واری ءِ ہرفے۔
