اسلام آباد۔ 19 جولائی (اے پی پی) صدر مملکت ڈاکٹر عارف علوی پارینے کہ پاکستان جموں و کشمیر اٹی آجو و بے کنڈ ہلوک استصواب رائے نا کمک اٹ کشمیری تے اوفتا حق خودارادیت کن تینا سیاسی، اخلاقی و سفارتی مخ تفی ءِ برجاتخک، سویلی ایشیا ٹی پائیدار امن اقوام متحدہ نا قرارداد ، کشمیری الس نا است خواہی تا رداٹ جھیڑہ نا پرامن ایسری آ منحصر ءِ، کوزہ گیر بھارتی فوج انا ظلم ، پرخ و ناانصافی آن پد ہم کشمیری تا تغ پورو مریک۔ سے شنبے نادے آ ایوان صدر نا پریس ونگ انا رداٹ داخیال آتا درشانی ءِ او جموں و کشمیر نا یوم الحاق پاکستان نا وخت آ تینا کلہو اٹی کرے۔ صدر مملکت پارے کہ پاکستان و مچ آ دنیا ٹی کشمیری الس جموں و کشمیر نا پاکستان تون الحاق نایات ءِ اڈتننگ ءُ، اینو نن کشمیری الس نا حق خودارادیت نا دوئی کننگ کن اوفتا جہد اٹی مخ تفی نا پوسکنی ءِ کینہ۔ صدر مملکت پارے کہ دادے 1947ء ٹی منظور کروک تاریخی قرارداد آتے مون آ تخسا ریاست جموں و کشمیر نا پاکستان تون الحاق ءِ اسہ حقیقت اس جوڑ کننگ کن اڈتننگک۔ اینو نن نرزور کشمیری الس نا تاریخی جہد اٹی دُوارہ اوفتے تون سلنگ نا عزم کینہ۔ اوپارے کہ کوزہ گیر بھارتی فوج انا ظلم و پرخ و نا انصافی آن پد ہم کشمیری تا تغ پورو مریک۔ اینو نن جموں و کشمیر نا الس نا بنداوی انسانی حق ءِ برقرار تخنگ نا تینا عزم انا درشانی ءِ کینہ، نن ہفت دہائی آن زیات وخت آ تالان کشمیری تا انصاف اٹ جہد ءِ خراج عقیدت پیش کینہ۔ صدر مملکت پارے کہ پاکستان جموں و کشمیر اٹی آجو و بے کنڈ ہلوک استصواب رائے نا کمک اٹ کشمیری تے اوفتا حق خودارادیت کن تینا سیاسی، اخلاقی و سفارتی مخ تفی ءِ برجاتخک، جہانی برادری آرٹیکل 35 اے و 370 معطل کننگ نا بھارتی غیر کانودی و اسہ کنڈی گام گیج آتے چٹفے، بھارت غیر کانودی و اسہ کنڈی وڑاٹ کشمیر نا خصوصی حیثیت ءِ چٹفے۔ صدر ڈاکٹر عارف علوی پارے کہ بھارت نا ڈومیسائل و ملکیتی کانود بھارت نا غیر کانودی کوزہ گیری ٹی جموں و کشمیر نا آبادیاتی پنجر و کشمیری تے اقلیت اٹ بدل کننگ کن بدل کننگا، کشمیری ہندوتوا بھارتی حکومت نا ظالمانہ و غیرکانودی گام گیج آتا برخلاف جہد کننگ ءُ۔
