کوئٹہ۔ 19 جولائی (اے پی پی) بلوچستان اٹی برجاپِرتا سوب آن پین 7 بندغ نا زوال کننگ آن پد صوبہ ٹی پِر تیان مروک آ مرک آتا کچ 82 مس، پِر تیان ہزار آ ہند آک بھس مسنو، ضلع پنجگور نا چندی علاقہ غاتیٹی شنزہ ئی پِر آن دیر بس، 100 آن زیات کچہ انگا ہندآک تمار وخت اس کہ پِر تیان داتم اسکان مسہ ہزار آن زیات ہند آک بھس مسنو۔ ترجمان پی ڈی ایم اے بلوچستان نا رپورٹ نا رداٹ بلوچستان اٹی برجاپِر تا سوب آن دوشنبے اسکان پین 7 بندغ آتا مرک پک مس اوکان پد مروک آ مرک آتا کچ 82 وخت اس کہ ٹھپی مروک آتا کچ 60 مسنے۔ رپورٹ نا رداٹ صوبہ ٹی پِر تیان 2536 ہند پورو وڑاٹ بھس مسنو وخت اس کہ 592 ءِ زرس نسخان رسینگانے، داتم اسکان پِر تیان غٹ آن زیات مالی نسخان ضلع واشک اٹی مسنے ہراڑے 2080 ہند و 550 کلومیٹر سڑک پورو وڑاٹ بھس مسنو۔ پی ڈی ایم اے نا رداٹ 706 ساہدار کسکنو، 1800 سولر پینل، 240 بورنگ، اسہ لکھ 97900 ایکڑ فصل آتے نسخان رسینگانے۔ ایلو کنڈآ ضلع پنجگور نا چندی علاقہ غاتیٹی شنزہ ئی پِر آن دیر بسنے، 100 آن زیات کچہ انگا ہند آک تمانو، سوردومری آباد اٹی نوکاپی ریلا 4 بندغ ءِ درینے ہرافتیان 2 نا لاش آتے کشنگا وخت اس کہ اِرا مسڑ نا پٹنگ جاری ءِ۔ طوفانی پر آن پد رخشاں ندی ٹی طغیانی نا حالیت ودی مس وخت اس کہ تربت و ہوشاب نا نیام اٹ ٹاورآتا تمنگ آن بجلی نا فراوانی آن شاری تے مشکلات آتون مون تروئی تما۔
