لاہور۔ 18 جولائی (اے پی پی) مسلم لیگ (ن) نا راہشون و بنجائی وزیر خواجہ سعد رفیق پارینے کہ مسلم لیگ (ن) اسہ جمہوری جماعت اسے ، ننا جمہوریت کن اسہ مرغن ءُ جہد اسے، نن جمہوریت نا بالادستی نا ہیت ءِ کرین، مہالو ہم الس نا فیصلہ ءِ امنا کرینن ، اینو ہم فیصلہ ءِ امنا کینہ، گوازی بناکرینے دی اینڈ آخا، نن ہم عمران خان آنبار غوغا کننگ کینہ ولے نن غوغاکپنہ،بروک آ حکمت عملی کن سیوتی جماعت آتا دیوان اس بٹنگانن اوٹی آخبت نا فیصلہ مریک، دا پاکستان تحریک انصاف نا کٹوک آ سیٹ آتیا گچین کاری مس ننا سیاسی جہد برجاسلک، اخلاقیات ءِ دامن ءِ ہلیتنون، سیوتی جماعت آتون اواری اٹ اہم فیصلہ کینہ، زرس انتظار کیر کل گڑاک مون آ بریرہ۔ او یک شنبے نا نن ہلہلہ ئی پریس کانفرنس آن تران کریکہ۔ داوخت آ ایاز صادق و ایلو لیگی راہشونک ہم اوڑتون اوار ئسر۔ خواجہ سعد رفیق پارے کہ ننا مقابلہ کبینی تون ئسک نن نہاد آتے ودفنگ نا جاگہ غا نرنگ ہم کرینہ ولے عمران خان نا گناہ تا بھاریم ءِ نن ہرفین، تینا سیاست ءِ گہیو تخان و ریاست ءِ بچفین دا جنگ زرگزرانی گچینی نا جنگ ءِ۔ سعد رفیق پارے کہ عمران خان ولدا دروغ تڑ پک مس انتئے کہ فوج الیکشن کمیشن پنجاب پولیس آ دھاندلی نا دوبہ غاک دروغ ئسر۔ ننے دُز دُز پاننگا ہرافتا نقش الس نا ذہن تیٹی ئس ولے نن تکڑا سلیسن۔ اوپارے کہ سیاسی کشمکش غلط ٹریک آ بایدے ہنپ، سیاسی جہد ءِ برجاتخنگک، ننا مقابلہ ہمو ٹولی تون ءِ ہرافتا ڈکشنری ٹی اخلاقیات نا لوز ہم اف۔ ننا حکومت عمران خان نا گناہ تا بھاریم ءِ ہرفے، کیئر ٹیکر حکومت بسکہ تو اسہ ملک یا مالیاتی ادارہ اس معاہدہ کتوکہ، حکومت ہلنگ ن لیگ نا تنیا فیصلہ ہلوکہ، غٹ سیوتی تا سلابت ئس اگہ حکومت ءِ ہلتونہ تو ملک ڈیفالٹ کریکہ۔ اوپارے کہ وونٹ انا شرف ءِ امنا کرفنگ کن ن لیگ و سیوتی جماعت آک خواری کریر مدام نن وونٹ انا شرف و بالادستی نا ہیت ءِ کرین۔ عمران خان حسب عادت شام آن دھاندلی نا غوغا کننگ نا بناءِ کریسس۔ عمران خان پائے کہ او و اونا سنگت دروغ تڑ پک مسنو۔ اوپارے کہ بنجائی و صوبائی حکومت و اسٹیبلشمنٹ بے کنڈ ہلوک ئسر۔ ندام نشیب و فراز ءِ اللہ نا مہروانی اٹ عبور کرین، مقابلہ و جہد برجاءِ و برجاسلک۔
