کوئٹہ۔ 18 جولائی (اے پی پی) ترجمان حکومت بلوچستان گودی فرح عظیم شاہ پارینے کہ وزیراعلیٰ بلوچستان میر عبدالقدوس بزنجو صوبہ ٹی پِر تیان پد دست و اسہال نا دین انا تالان مننگ و مخلوق نا زہمی مننگ نا نوٹس ءِ ہلسا سیکرٹری جان جوڑی بلوچستان صالح محمد ناصر و ڈائریکٹر جنرل ہیلتھ ڈاکٹر نور محمد قاضی ءِ دمدستی وڑاٹ زہمی ضلع غاتیٹی جان جوڑی نا آسراتی ، درمان و دوائی تا دوئی کننگ نا جاچ ءِ ہلنگ و چاروکی ءِ کننگ نا پرمان کرینے ہراڑآ سیکرٹری جان جوڑی و ڈی جی ہیلتھ غٹ آن زہمی ضلع ژوب آ سرمرسا آسراتی و ساڑی حالیت آتا جاچ ءِ ہلنگ ءُ۔ اوپارے کہ ساڑی پِر تیان صوبہ نا 16 ضلع غاتیٹی دست و اسہال نا دین آن چندی بندغ خاص وڑاٹ چناک زہمی مننگ ءُ، صوبائی حکومت دا بابت محکمہ جان جوڑی نا بڑزکو کمامدار آتے متحرک کرسا زہمی ضلع غاتیٹی مخلوق نا درمان و بچفنگ کن سختی اٹ تاکید کرینے کہ زہمی ناجوڑ آتے درمان نا آسودہی فراوان کننگ کن ہرممکن گام گیج کننگے۔ اوپارے کہ صوبہ ٹی دست انا دین انا مون ءِ توننگ کن خصوصی طبی ٹیم زہمی علاقہ غاتیا گدریفنگ انگ ءِ۔ ساڑی پِر تیان کنوئی آ ساف دیر انا ذریعہ بھاز زہمی مسنو ہنداخاطرآن صوبائی حکومت اوفتا بحالی کن ہم ہرممکن گام گیج کننگ ءِ ، صوبہ ٹی دست انا دین انا مون ءِ توننگ کن صوبائی محکمہ جان جوڑی، جہانی ادارہ و ضلعی انتظامیہ نا کنڈآن غٹ المی گام گیج کننگ انگ ءِ۔
