وزیراعظم شہباز شریف نا مصر و پاکستان نا نیام اٹ تین پہ تینی فائدہ غاتا غٹ بشخ آتیٹی کمکاری ءِ پین سوگو کننگ نا عزم انا درشان

اسلام آباد۔ 15 جولائی (اے پی پی) وزیراعظم محمد شہباز شریف مصر و پاکستان نا نیام اٹ تین پہ تینی فائدہ غاتا غٹ بشخ خاص وڑاٹ واپار، زرکاری، توانائی ، تعلیم و موسمیاتی بدلی ٹی کمکاری ءِ پین سوگو کننگ نا تینا عزم انا درشانی ءِ کرینے۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف تون مصر انا سفیر طارق داروگ اوڑدہی کرے۔ اوڑدہی ٹی تین پہ تینی است خواہی نا امور آ گپ وتران کننگا، وزیراعظم پاکستان و مصر انا نیام اٹ چندی بشخ آتیٹی کمکاری نا مون آ دننگ کن اونا کوشست آتا ستاءِ کرے۔ پاکستان و مصر انا نیام اٹ دوستانہ تعلقداری تے تالان کرسا وزیراعظم ہڑتوم آ ملک آتا نیام اٹ تین پہ تینی فائدہ غاتا غٹ بشخ خاص وڑاٹ واپار، زرکاری، توانائی ، تعلیم و موسمیاتی بدلی ٹی کمکاری ءِ پین سوگو کننگ نا تینا عزم انا درشانی ءِ کرے۔ اومصر ءِ کوپ 27 نا صدر نا عہدہ ءِ سنبھالنگ آ مبارکبادی تس۔ محمد شہباز شریف اونا چکار ءِ بھارت نا غیر کانودی کوزہ گیرجموں و کشمیر اٹی انسانی حق انا بھلا خلاف ورزی تا کنڈآ کرفے۔ اواقوام متحدہ نا سلامتی کونسل نا تعلقدار قرارداد و کشمیری الس نا است خواہی تا رداٹ جموں و کشمیر نا جھیڑہ نا پرامن ایسری نا اہمیت آ زور شاغا۔ مصر انا سفیر اونا ستاءِ کرسا منت واری ءِ ہرفے و اودے وزیراعظم نا عہدہ ءِ سنبھالنگ آ مبارکبادی تس۔ اومصر انا الس و سرکڑدہ غاتا کنڈآن ہم نیک است خواہی نا کلہو سرکرے۔ سفیر پارے کہ مصر انا کماشی اونا کوپ 27اٹی بشخ ہلنگ نا چاری ءِ۔ وزیراعظم شہبا ز شریف مصر انا صدر فتح السیسی کن نیک است خواہی نا درشانی ءِ کرے و اودے دورہ پاکستان نا سلہ خلک۔