پاکستان اٹی ڈیجیٹل اکانومی نا مون آ دننگ کن ایڈوائزری کونسل ءِ اسہ ہفتہ ٹی سلاہ و سوج جمع کرفنگ نا پارت

اسلام آباد۔ 15 جولائی (اے پی پی) پاکستان اٹی ڈیجیٹل اکانومی نا مون آ دننگ کن جوڑ ایڈوائزری کونسل نا اسہ ہفتہ ٹی سلاہ و سوج جمع کرفنگ نا پارت کننگا۔ وزیراعظم پاکستان نا ایڈوائزری کونسل انفارمیشن ٹیکنالوجی و ڈیجیٹل اکانومی نا بنائی دیوان تدوک آ دے بنجائی وزیر انفارمیشن ٹیکنالوجی و ٹیلی کام سید امین الحق نا کماشی ٹی مس۔ دیوان اٹی بنجائی وزیر خزانہ مفتاح اسماعیل ، وزیراعظم نا خصوصی کمکار امور نوجواناں شزافاطمہ ، سینیٹر افنان اللہ خان ، سیکرٹری انفارمیشن ٹیکنالوجی محسن مشتاق چاندنا، ایڈیشنل سیکرٹری عائشہ حمیرا، مسکوہی سیکرٹری آئی ٹی شعیب احمد صدیقی، سی ای او جاز عامر ابراہیم ، چیئرمین پاشا بدر خوشنود و ایلو کونسل باسک آک ساڑی ئسر۔ دیوان اٹی پاکستان اٹی ڈیجیٹل اقتصادی سرجز آتا مون آ دننگ کن انفارمیشن ٹیکنالوجی اینڈ ٹیلی کام انڈسٹری نا بابت تعلقدار باندات آتیا شرہ کننگا۔ داوخت آ پاکستان اٹی ڈیجیٹل اکانومی نا مون آ دننگ نا بابت غٹ سٹیک ہولڈر آتا سلاہ غاتیا ہم گپ وتران کننگا و سیکٹر نا شونداری و چیلنج آتون مون تننگ کن چندی امور آ گپ وتران کننگا۔ ممبر آئی ٹی، ممبر ٹیلی کام، ایم ڈی پی ایس ای بی و سی ای اوجاز کونسل ءِ ویل آتا ایسری نا بارواٹ حوال تس ڈیجیٹل اکانومی نا مون آ دننگ نا پلان اس پیش کرے۔ بنجائی وزیر انفارمیشن ٹیکنالوجی و ٹیلی کام سید امین الحق آئی ٹی ایکسپورٹ ، پرسنل ڈیٹا پروٹیکشن و ٹیلی کام سیکٹر گروتھ نا بابت مسہ سب کمیٹی جوڑ کرسا اسہ ہفتہ ٹی تینا سلاہ و سوج پیش کننگ نا پارت کرے۔ دا سلاہ و سوج آتے ایڈوائزری کونسل انفارمیشن ٹیکنالوجی و ڈیجیٹل اکانومی نا چیئرمین وزیراعظم پاکستان محمد شہباز شریف ءِ پیش کننگک۔