اسلام آباد۔ 26اپریل (اے پی پی) چین پاکستان اقتصادی راہداری نا شش میکو اسیجائی کمکار کمیٹی (جے سی سی ) گوادر اٹی اہم ڈٹ ہرافتے ٹی گوادر پورٹ انا اپ گریڈیشن ، ایکسپریس وے ، گوادر انٹرنیشنل ایئر پورٹ و گوادر فری زون و پورٹ ڈویلپمنٹ اوار ئُ نا منظوری ئِ تسنے ہرافتیان گڑاس ڈٹ آتیا کاریم نا بناءمسنے۔ وزارت ڈٹ بندی و شونداری نا ذرائع ”اے پی پی“ ئِ پارے کہ بنجائی حکومت اینخو مالی سال اٹی چین پاکستان اقتصادی راہداری کن سرکاری بشخ انا شونداری پروگرام اٹی بھلو زراس جتا کرینے، حکومت مالی سال نا بجٹ اٹی اقتصادی راہداری نا ڈٹ ئِ خصوصی اہمیت تننگ ئِ تانکہ اقتصادی و معاشی شونداری و شونہالی نا ہدف آتیٹی کمک دوئی کننگ مرے۔ گوادر بندرگاہ نا کچ ئِ ودفنگ کن گوادر اپ گریڈیشن ڈٹ آ دمدستی کاریم نا بناءکننگ آ امناکننگا داڈٹ انا رداٹ ساڑی کثیر المقاصد ٹرمینل نا ودیکی و ایسٹ بے ایکسپریس وے ، گوادر ایئر پورٹ آ کاریم ئِ ترند کننگ تون اوار اوار گوادر اٹی واٹر سپلائی اسکیم نا ہم بنائِ کننگک۔ گوادر شار ئِ ڈٹ بندی نا رداٹ جوڑ جاڑ کننگ کن گوادر ماسٹر پلان ئِ پورو کننگ نا پارت کننگا۔ جے سی سی گوادر اٹی 300 میگاواٹ بجلی نا پیداوار نا ڈٹ آتا منظوری آ است جمی نا درشانی ئِ کرے۔ بجلی نا گرج آتے پورو کننگ کن کولاآن چلینگوک آ دا ڈٹ آ کاریم نا بناءمسنے۔ گوادر فری زون و پورٹ ڈویلپمنٹ نا چندی ڈٹ و گوادر ووکیشنل انسٹی ٹیوٹ نا جوڑ جاڑی کاریم ئِ پین ترند کننگ نا فیصلہ کننگانے۔ گوادر فری زون اٹی زرکاری نا چرجوئی نا بناءمسنے ہراڑے اسٹیل، پیٹرو کیمیکلز و ایلو صنعت آتا قیام آ کاریم نا بناءمسنے۔ راجی بشخ انا شونداری نا رداٹ چین نا کمک آن گوادر ہسپتال ئِ 150 بیڈ اسکان اپ گریڈ کننگ، تعلیم نا بشخ اٹی پین کاریم کننگ، گوادر یونیورسٹی تون صف اول نا چینی یونیورسٹی نا کمک نا بابت ہم فیصلہ مسنے، چینی یونیورسٹی تون اواری اٹ میرین و میری ٹائم تون اوار اوار ایلو بشخ آتیٹی کمک فراوان کیک۔ گوادر نا ماہی گیر و کشتی جوڑ کروک آتا روزگار و اودے رکھ فراوان کننگ کن گام گیج کننگک۔پاک چین اقتصادی راہداری ڈٹ انا بناءنا اِراسال پد پاکستان نا ہندی باتی تا زند اٹی خاطر خواہ گچینی و بدلی بسنے۔ دا پروجیکٹ چینی حکومت نا ”بیلٹ اینڈ روڈ اینیشی ایٹو“ پروجیکٹ نا اہم ئُ عنصر اسے ہراکہ چینی صدر نا دورہ پاکستان اٹی 2015ءٹی باضابطہ وڑاٹ بناءکننگاسس۔
