اسلام آباد۔ 24اپریل (اے پی پی) وزیر مملکت کیڈ طارق فضل چوہدری پارینے کہ پانامہ پیپر کیس جے ٹی آئی نا جاست وپاست آن پد پورووڑاٹ بندمریک۔ نجی ٹی وی تون ہیت وگپ کرسا اوپارے کہ سپریم کورٹ نا کنڈآن پانامہ پیپرز کیس آ فیصلہ وزیراعظم محمد نواز شریف نا حق اٹی ئِ و جوائنٹ انویسٹیگیشن ٹیم (جے آئی ٹی ) نا جاست و پاست آن پد کیس پورووڑاٹ بند مریک۔ طارق فضل چوہدری پارے کہ مسلم لیگ (ن) پاکستان نا پنی اِنگا جماعت ئِ و داہیت انا صفا شاہدی ساڑی ہی ٹی تلہ گنگ اٹی مروک آ ضمنی گچین کاریک ئُ ہراٹی خلقت (ن) لیگ نا اومیت دار ئِ وونٹ ترسا صفائُ سرسہبی اس ترفینو۔ اسہ سوج اسے نا ورندی ٹی اوپارے کہ گدرینگوک آ دور اٹی پیپلزپارٹی آ ہم کرپشن نامقدمہ قائم کننگا اوفتیان اسہ کیس اس ہم مسلم لیگ (ن) نا کنڈآن درج کرفنگ تو۔پانامہ پیپر فیصلہ نا بابت اوتعجب نا درشانی ئِ کرسا پارے کہ سپریم کورٹ نا کنڈآن پانامہ پیپرز نا فیصلہ ئِ پی ٹی آئی اولیکو دے امنا کرے وخت اس کہ ارٹ میکو دے برانز کننگ نا بنائِ کرے۔ وزیر مملکت کیڈ پارے کہ وزیر اعظم محمد نواز شریف آن استیفہ ہلنگ نا تحریک انصاف نا خواہش وخت اس ہم پورو مفک۔
