انقرہ۔ 01 جون (اے پی پی) وزیراعظم محمد شہباز شریف پاکستان و ترکی نا نیام اٹ سٹریٹجک تعلقداری نا مرکزی جزو انا وڑاٹ سوگو اقتصادی شریداری نا مون آ دننگ نا اہمیت آ زور شاغانے، ہڑتوم آ ملک آتا الس نا نیام اٹ پیڑی تیا متکن تعلقداری مہرومریبت، پیار، اسیجائی بولی، دودوربیدگ، و مذہبی میرات نا سوگو بنداوتیا سلوک ءُ، پاکستان مذاکرات و سفارت کاری نا کمک اٹ یوکرائن نا جھیڑہ نا زوت آن زوت ایسر نا خواہندار ءِ۔ چارشنبے نادے آجاری اعلامیہ نا رداٹ وزیراعظم شہباز شریف ترکی نا صدر رجب طیب اردوان تون اوڑدہی کرے۔ انقرہ ٹی صدارتی ماڑی آ بننگ آ صدر رجب طیب اردوان وزیراعظم ءِ بخیر کرے۔ وزیرخارجہ بلاول بھٹو زرداری، وزیر دفاع خواجہ محمد آصف، وزیر واپار سید نوید قمر، وزیرحوالکاری و شینکاری مریم اورنگزیب ، وزیراعظم نا خصوصی کمکار طارق فاطمی، فہد حسین و سینئر بڑزکو کمامدارآک اوڑتون اوار ئسر۔ وزیراعظم ناصدارتی کمپلیکس آ سرمننگ آ گارڈ آف آنر اتون جم وجوش اٹ بیابخیری کننگا۔ ہڑتوم آ ملک آتا قومی ترانہ ءِ خلنگا۔ ہڑتوم آ راہشونک اسہ ایلو تون تینا ڈل آتا درستی راستی ءِ کرفیر۔ ہڑتوم آ راہشونک ڈل آتیان بیدس اوڑدہی کریر اوکان پد فریق آتا نیام اٹ ڈل آتا کہول آ مذاکرات مس ۔ وزیراعظم شہباز شریف پارے کہ ہڑتوم آ ملک آک اینخو سال سفارتی تعلقداری تا جوڑ مننگ نا 75 می سال دے ءِ اڈتننگ ءُ۔ اوپارے کہ ہڑتوم آ ملک آتا الس نا نیام اٹ پیڑی تیا متکن تعلقداری مہرومریبت، پیار، اسیجائی بولی، دودوربیدگ و مذہبی میرات نا سوگو بنداو تیا سلوک ءُ۔ وزیراعظم پارے کہ ہڑتوم آ ملک آک مشکل نا ہر ساہت اٹ مدام اسہ ایلو تون سلیسر و دا دوستانہ تعلقداری بروک آ چین تے منتقل مس۔ اوپیدوار کرے کہ ہڑتوم آ ملک آتا نیام اٹ تعلقداری پت، مفاہمت و تین پہ تینی کمکاری نا کمک اٹ منفر د ئسر۔ فریق آک واپار ، زرکاری و دفاع تون اوار چندی بشخ آتیٹی تین پہ تینی کمکاری سوگو کننگ آ گپ وتران کریر۔ وزیراعظم ہڑتوم آ ملک آتا نیام اٹ ہندن ءُ سٹریٹجک تعلقداری تا اہمیت آ زور شاغا ہرانا مرکزی نقطہ زرگزرانی شریداری ءِ مون آ دننگ مرے۔ بڑزکو کہولی سٹریٹجک کمکاری و سٹریٹجک اقتصادی فریم ورک ، تین پہ تینی کمکاری نا مون آ دننگ اٹ اہم ذریعہ گوندنگا۔ ہڑتوم آ راہشونک بڑزکو کہولی سٹریٹجک کمکاری (ایچ ایل ایس سی سی ) ستمبر اٹی پاکستان اٹ اڈتننگ آ امنا کریر تانکہ دا عمل اٹ پین پیش رفت مرے۔ وزیراعظم پارے کہ پاکستان جون 2022ء ٹی ترکی نا واپاری ڈل انا خیرمقدم نا چاری ءِ۔ اوترکی نا زرکارآتے پاکستان خاص وڑاٹ پن بجلی و قابل تجدید توانائی نا بشخ آتیٹی زرکاری نا سلہ خلک۔ وزیراعظم پارے کہ او پک کیک کہ ترکی نا کمپنی تے ساڑی و آخبت نا زرکاری نا ڈٹ آتیٹی ہر ممکن آسراتی فراوان کننگک۔ ترکی نا جموں و کشمیر نا جھیڑہ غا بدل مفروک و اصولی موقف نا مخ تفی آ گپ وتران کرسا وزیراعظم پارے کہ دا جھیڑہ غا صدر رجب طیب اردوان نا موقف کشمیری و پاکستانی الس کن سوگوی نا سوب ءِ۔ او دا انصاف اٹ جہد کن ترکی نا سرکڑدہ و الس نا مخ تفی نا منت واری ءِ ہرفے۔ او ڈیہہ و ڈیہہ آن پیشن امن وسلامتی کن ترکی نا شریداری نا ستاءِ کرے و ترکی نا اہم فائدہ غاتا امور آ پاکستان نا کمک و یکجہتی نا درشانی ءِ کرے۔ اوغانستان نا بابت شہباز شریف ترکی نا انسانی امداد و تعمیری گپ وتران نا ستاءِ کرے۔ اوپارے کہ پاکستان اوغانستان نا ہمسایہ ملک مننگ نا ناطہ ساڑی آ چیلنج خاص وڑاٹ انسانی تنکی نا حالیت و زرگزرانی بدحالی نا چیلنج تون مون تننگ کن کمک کیک و اوغان الس تون تفک۔ فریق آک پرامن، سوگو و شونہال اوغانستان نا اسیجائی ہدف آتا دوئی کننگ کن اواری اٹ کاریم کننگ ءِ برجاتخنگ آ امنا کریر۔ وزیراعظم روس و یوکرائن جھیڑہ نا سفارتی ایسری کن مذاکرات اٹ آسراتی فراوان کننگ آ صدر طیب اردوان نا ستاءِ کرے و زور شاغا کہ پاکستان مذاکرات و سفارت کاری نا کمک اٹ یوکرائن نا جھیڑہ نا زوت آن زوت ایسر نا خواہندار ءِ۔ ہڑتوم آ ملک آک ہڑتوم آ کنڈآتا واپار و زرگزرانی تعلقداری تا مون آدننگ نا بابت اسیجائی وزارتی بیان نا بابت مفاہمت نا یات داشت آ دستخط کریر۔ ہراٹی ہڑتوم آ ملک آک 3 سال اٹی تین پہ تینی واپاری کچ 5 ارب ڈالر اسکان دننگ نا ہدف نا دوئی کننگ نا عزم کریر۔ داوخت آ ہڑتوم آ ملک آتا نیام اٹ سفارتی تعلقداری نا 75 سال پورو مننگ آ اسیجائی لوگو اس جاری کننگا۔ ہڑتوم آ راہشونک امنا کریر کہ ہڑتوم آ ملک آتیٹی دا سال دے ءِ شایان شان وڑاٹ اڈتننگک۔ ہڑتوم آ راہشونک اسیجائی پریس کانفرنس آن تران کریر۔ وزیراعظم شہباز شریف اونا و اونا ڈل انا جم و جوش اٹ بخیر و شاندار مہمانداری آ اوفتا منت واری ءِ ہرفے۔ وزیراعظم صدر طیب اردوان ءِ دورہ پاکستان نا سلہ خلسا پارے کہ پاکستانی الس اودے پبی بخیر کننگ نا چاری ءِ۔ ہڑتوم آ راہشونک پاکستان وترکی نا نیام اٹ تعلقداری تے پوسکن آ بڑزی تیا دننگ کن خڑکی رابطہ غا امنا کریر۔
