شوگرمل آتیان بھلو کچ اسے ٹی بورہ ہلوک آ غیر رجسٹرڈ ہول سیلر، ڈیلرو ڈسٹری بیوٹر آتے خراج نیٹ اٹ اتنگے، صدر ڈاکٹر عارف علوی نا ایف بی آر ءِ پارت

اسلام آباد۔ 30 مئی (اے پی پی) صدر مملکت ڈاکٹر عارف علوی فیڈرل بورڈ آف ریونیو(ایف بی آر) ءِ خراج نیٹ ءِ ودفنگ کن شوگر مل آتیان بھلو کچ اسے ٹی بورہ ہلوک آ غیر رجسٹرڈ ہول سیلر، ڈیلرو ڈسٹری بیوٹرآتے خراج نیٹ اٹ اتنگ نا پارت کرسا پارینے کہ خراج ادائیگی ءِ ودفنگ کن محتسب نا سلاہ و سوج آتے بورہ نا مچ آبشخ آتیا لاگو کننگے۔ ایوان صدر نا پریس ونگ انا کنڈآن دوشنبے نادے آ جاری بیان نا رداٹ صدر مملکت دا پارت آتے بنجائی خراج محتسب نا پرمان تا برخلاف ایف بی آر نا کنڈآن دائر 25 اسہ وڑنا درخواست آتے سرترسا جاری کرے ہراٹی ایف بی آر ءِ پارت کننگاسس کہ بورہ نا غیر رجسٹرڈ ہلوک آتے بھلو کچ اسے آ خراج نیٹ اٹ اتنگے تانکہ سیلز خراج نا وصولی ءِ گچین کننگ مرے۔ اوپارے کہ مشاہدہ ٹی بسنے کہ بھلا مالیاتی لین دین کننگ و ایف بی آر تون تینا ڈیٹا نا دستیابی آن پد ہم بورہ نا دا غیررجسٹرڈ ہلوک زیات تر خراج نیٹ آن پیشن ئسر و خراج نا ادائیگی نا قومی زمواری آن بچنگ ءُ۔ اوایف بی آر ءِ پارت کرے کہ بورہ نا غیر رجسٹرڈ ہلوک آتے خراج نیٹ اٹ اوار کننگے تانکہ اوفتیان سیلز خراج نا وصولی ءِ کننگ مرے۔ صدر مملکت پارے کہ ایف بی آر نا فیلڈ فارمیشنز غیررجسٹرڈ ہلوک آتا معلومداری ءِ یکجا کننگ اٹ چُست اف، ایف بی آر مل آتا ماہانہ سیلز خراج گوشوارہ غاتیا است جم ءِ، ڈیٹا نا جاچ ءِ ہلپننگ انگ ءِ۔ اوپارے کہ ایف بی آر تون شوگر مل آتا بینک اکاؤنٹ آتیٹی لین دین نا ہم سرجم ساڑی ءِ۔ صدر پارے کہ ایف بی آر نا فیلڈ فار میشنز شوگر مل آتا ڈیٹا نا وخت آ جاچ ءِ ہلسا ہلوک آتا سرجم آتے دوئی کننگ کیک، ایف بی آر نا تینا فرض انا ادائیگی ٹی سنگین ڈیوالئی و نابودی بدانتظامی نا مترادف ءِ، خراج ادائیگی ءِ ودفنگ کن محتسب نا سلاہ و سوج آتے مچ آ بورہ نا بشخ آتیا لاگو کننگے۔ صدر ڈاکٹر عارف علوی ایف بی آر ءِ پارت کرے کہ او 90 دے اٹی خراج محتسب ءِ عملدرآمد نا جوان ءُ رپورٹ اس پیش کے۔ صدر مملکت ایف بی آر نا بنجائی خراج محتسب نا پارت آتا برخلاف 25 درخواست آتے مسترد کرسا پارے کہ ایف بی آر تون ڈیٹانا دوئی مننگ آن پد ہم بھلو کچ اسے ٹی بورہ نا ہلوک خراج نیٹ آن پیشن ءُ، خراج وصولی تے ودفنگ کن بورہ نا بھلا ہلوک و غیر رجسٹرڈ ڈیلرآتے خراج نیٹ اٹ اتنگے۔ اوپارے کہ بورہ نا غیر رجسٹرڈ ہلوک خراج ادائیگی نا قومی زمواری ءِ پورو کپننگ ءُ۔ داہیت ذکر انا قابل ءِ کہ محتسب چندی پرائیویٹ شوگر مل آتیان بورہ نا غیر رجسٹرڈ ہلوک آتے خراج نیٹ اٹ اتنگ کن جاست وپاست نا بناءِ کریسس۔ دابابت رپورٹ اٹی پاننگانے کہ شوگر مل آتون بورہ نا سپلائی و ہلوک آتا ریکارڈ مفننگ آن پد ہم ایف بی آر خراج نا دنگ ءِ ودفنگ آ چکار کتو۔ رپورٹ نا رداٹ ایف بی آر شوگر مل آتا ڈیٹا نا جاچ ءِ ہلنگ و مخلوق ءِ خراج نیٹ اٹ اوار کننگ اٹ بے سہب مس۔ محتسب ایف بی آر ءِ پارت کریسس کہ او غیر رجسٹرڈ بندغ آتے خراج نیٹ اٹ اوار کے ہراڑآ ایف بی آر بنجائی خراج محتسب نا پرمان نا برخلاف صدر مملکت تون درخواست اس دائر کریسس۔