فلسطین نا مخ تفی ٹی پاکستانی پالیسی ٹی بدلی اس بسنے ، نئے بریک، بنجائی وزیر حوالکاری مریم اورنگزیب نا پالیسی بیان

اسلام آباد۔ 30 مئی (اے پی پی) بنجائی وزیر حوالکاری و شینکاری مریم اورنگزیب پارینے کہ فلسطین نا مخ تفی ٹی پاکستانی پالیسی ٹی بدلی اس بسنے ، نئے بریک، فلسطین آ پاکستان نا ریاستی پالیسی پیدوار و بابائے قوم قائد اعظم نا رمائشت آتیا مبنی ءِ، پاکستان نا الس نا است خواہی تیان چپ ہچ ءُ پالیسی یا گام اس مننگ کپک، پاکستان فلسطین نا ویل و اسرائیل نا بابت تینا روایتی و اصولی موقف آ سختی اٹ سلوک ءِ، وزارت خارجہ پیدوار کرینے کہ پاکستان آن ہچ ءُ ڈل اس اسرائیل آ ہنتنے۔ دوشنبے نادے آ تینا پالیسی بیان اٹی بنجائی وزیر حوالکاری پارے کہ اقوام متحدہ نا سلامتی کونسل نا قرارداد آتا رداٹ فلسطینی تا استصواب رائے نا حق انا پورو مخ تفی ءِ کینہ۔ اوپارے کہ دنیا اِر اریاستی ایسر ءِ ڈیہہ ٹی پائیدار امن نا ضامن تکک۔ اوپارے کہ 1967ء آن مست انا سیم، بیت المقدس دارالحکومت و جغرافیائی وحدت نا حامل فلسطینی ریاست نا قول ءِ پورو کننگے۔ بنجائی وزیر حوالکاری پارے کہ مقبوضہ فلسطین و مقبوضہ جموں و کشمیر اقوام متحدہ نا سلامتی کونسل نا ایجنڈا غا متکن انگا امور ءِ ہرافتا ایسری جہانی برادری نا زمواری ءِ۔ دا ہڑتوم آ ویل آتا انصاف اٹ ایسر اسکان دنیا ٹی پائیدار امن  اسہ تغ اس سلک۔ اوپارے کہ مقبوضہ فلسطین و غیرکانودی وڑاٹ بھارت نا غیرکانودی کوزہ گیر جموںو کشمیر نا الس نا انصاف اٹ جہد نا ہرممکن مخ تفی ءِ برجاتخک۔ مریم اورنگزیب پارے کہ اڑزآن سیاسی شہرت کن ہرمنفی گام کروک آ ک قومی فائدہ غاتا تو خیال ءِ تخر، دورہ ٹی اوار پی ٹی وی نا اینکر ءِ برطرف و آف ایئر کننگانے، ہندا اینکر تینا ذاتی حیثیت اٹ دورہ غا ہناسس۔