وزیراعظم شہباز شریف 31 مئی آن 2 جون ترکی نا دورہ ءِ کیک، بنجائی وزیر حوالکاری مریم اورنگزیب

اسلام آباد۔ 30 مئی (اے پی پی) بنجائی وزیر حوالکاری و شینکاری مریم اورنگزیب پارینے کہ وزیراعظم شہباز شریف 31 مئی آن 2 جون اسکان برادر ملک ترکی نا دورہ ءِ کیک۔ دا دورہ پاکستان نا روایتی باپت سنگت و ایلم ملک آتون ہڑتوم آ کنڈآتا تعلقداری نا پوسکنی نا چرجوئی نا کڑی اسے۔ دوشنبے نادے آ تینا ٹویٹ اٹی اوپارے کہ دا دورہ ہڑتوم آ ملک آتا نیام اٹ تعلقداری نا مون آ دننگ آن بیدس زرکاری، واپار، جان جوڑی ، تعلیم، دودوربیدگ و تین پہ تینی فائدہ نا ایلو بشخ آتیٹی کمکاری نا بابت ہم بھاز اہم ءِ۔ اوپارے کہ پاک ترکی بزنس کونسل نا دیوان، ترک زرکار و پوریاگر آتون اوڑدہی ہم مریک۔ بنجائی وزیر حوالکاری پارے کہ وزیراعظم دورہ ٹی مصطفیٰ کمال اتاترک نا مزار آ حاضری ایتک۔ ترک صدر رجب طیب اردوان تون اوار وزیراعظم ترکی و پاکستان نا سفارتی تعلقداری تا جوڑ کننگ نا 75 سال پورو مننگ نا وخت آ یات گاری نشان اس جاری کیک۔ صدر اردوان وزیراعظم نا شرف اٹی سوارہ اس ہم ایتک۔