اسلام آباد۔ 29 مئی (اے پی پی) پنچ سال آن کم وئی نا 43 ملین آن زیات چناتے پولیو آن بچفنگ نا پڑی کنفنگ کن مچ آ ملک اٹی ہفت دے ئی انسداد پولیو مہم یک شنبے نادے آ ہم برجائسک۔ وزارت جان جوڑی نا ترجمان نا رداٹ 339،521 آن زیات تربیت یافتہ پولیو ورکرز چناتے اوفتا درگہ غا پولیو آن بچفنگ نا پڑی کنفنگ نا مہم اٹی اختہ ءُ۔ اوپارے کہ تدوک آ مہم منہ علاقہ غاتیٹی محدود ئس ولے دا مہم ملک انا غٹ علاقہ غاتیٹی بناکننگانے۔ وزیر جان جوڑی قادر پٹیل پارے کہ حکومت پولیو نا چٹفنگ کن سنبرینگوک ءِ و پاکستان ءِ پولیو آن پاک ملک اس جوڑ کننگ کن تغ ءِ پورو کننگ کن بنجائی و صوبائی ہڑتوم آ کہول آتیا گچین وڑاٹ مربوط کوشست آتیا چکار کرینے۔ اووار وار ویکسی نیشن مہم نا سرسہبی ٹی لمہ و باوہ و خیال تخوک آتا اہم کڑد آ زور شاغا۔ اوپارے کہ ہر پاکستانی نا دا قومی فرض ءِ کہ او داہیت ءِ پک کے کہ ہر مہم اٹی تینا چناتتون اوار اوار ایب وکیب انا چناتے ہم پولیو نا پڑی کنفنگے۔ اوپارے کہ جنگلی پولیو دین گڑاس ضلع غاتا چاگڑد اٹ ساڑی ءِ ہراڑآن کیس آتا دُوارہ مننگ نا خطرہ ءِ، نن غٹ لمہ و باوہ و خیال تخوک آتیان ویکسی نیٹر آتون کمک کننگ کن پاننگ اُن انتئے کہ ہراتم اسکان غٹ چناتے ویکسین خلنگپک اسہ چناس ہم رکھ اف۔
