اسلام آباد۔ 25 مئی (اے پی پی) وزیراعظم محمد شہباز شریف تون برطانیہ نا سلہہ بند فوج انا وزیر جیمز ہیئپی چارشنبے نادے آ داوڑے اوڑدہی کرینے۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم شہباز شریف پارے کہ پاکستان و یوکے نا نیام اٹ دیرینہ شریداری ساڑی ءِ و ہڑتوم آ ملک و الس نا نیام اٹ تاریخی رابطہ ساڑی ءِ۔ وزیراعظم دا اومیت نا درشانی ءِ کرے کہ پاکستان و برطانیہ نا نیام اٹ انہانسڈ سٹریٹجک ڈائیلاگ (ای ایس ڈی ) آن تین پہ تینی است خواہی نا بشخ آتیٹی ہڑتوم آ کنڈآتا رابطہ غاتے سوگو کننگ اٹ کمک رسینگک۔ او ہڑتوم آ ملک آتا نیام اٹ واپار و زرکاری ءِ پین ودفنگ نا است خواہی نا درشانی ءِ کرے۔ ہڑتوم آ ملک آتا نیام اٹ اینخو سال سفارتی تعلقداری نا 75 می سال دے انا بابت وزیراعظم دا اومیت نا درشانی ءِ کرے کہ اودے گچین وڑاٹ اڈتننگک و داڑآن ہڑتوم آ ملک آتا نیام اٹ کمکاری ءِ پین ودفنگ نا پوسکن ءُ وارخواہی دوبریک۔ وزیراعظم اوغانستان اٹی امن و سوگوی نا اہمیت آ زور شاغسا اوغانستان اٹی انسانی المیہ غان بچنگ کن ہلہلہ ئی بنداو تیا المی گام گیج کننگ نا اہمیت ءِ تالان کرے۔ اوپارے کہ 4 کروڑ اوغان تا راجی آسراتی بایدے اولیت مرے۔ یوکرین نا باندات آ تینا گڑتی نا درشانی ءِ کرسا وزیراعظم پارے کہ برجاجھیڑہ غان پدتموک ملک آک زہمی مسنو۔ اوداباندات آ پاکستان نا اصولی موقف نا ہم درشانی ءِ کرے۔ اوجہانی برادری آ زور شاغا کہ او اقوام متحدہ نا چارٹر و جہانی کانود نا رداٹ داویل انا سفارتی ایسر اس پٹنگ نا کوشست کے۔ وزیراعظم مقبوضہ جموں و کشمیر نا حالیت آتے پیدوار کرسا بھارت تون اوار ڈیہہ ٹی امن نا مون آ دننگ کن پاکستان نا عزم انا درشانی ءِ کرے۔ وزیراعظم جموں وکشمیر نا جھیڑہ ءِ اقوام متحدہ نا سلامتی کونسل نا قرارداد و کشمیری الس نا است خواہی تا رداٹ پرامن وڑاٹ ایسر کننگ نا اہمیت آ زور شاغا۔ او سویلی ایشیاٹی سوگو عسکری توازن ءِ برقرار تخنگ نا اہمیت آ ہم زور شاغا۔ برطانوی وزیر ہم ہڑتوم آ ملک آتا نیام اٹ تاریخی تعلقداری نا ذکر ءِ کرسا واپار و زرکاری تون اوار چندی بشخ آتیٹی اوفتے پین مون آ دننگ نا است خواہی نا درشانی ءِ کرے۔ او خاص وڑاٹ 15 اگست 2021 آن پد اوغانستان اٹی مروک آ پیش رفت نا رداٹ درملکی تا پیش تمنگ تون اوار برطانیہ تون پاکستان نا کمکاری آ تینا حکومت نا کنڈآن منتواری ءِ ہرفے۔
