وزیرخارجہ بلاول بھٹو زرداری نا خلیج کمکار کونسل نا سیکرٹری جنرل تون اوڑدہی، تین پہ تینی کمکاری نا حالیت آتا جاچ ءِ ہلکر

اسلام آباد۔ 25 مئی (اے پی پی) وزیرخارجہ بلاول بھٹو زرداری خلیج کمکار کونسل (جی سی سی ) نا سیکرٹری جنرل ڈاکٹر نائف فلاح ایم الحجراف تون چارشنبے نادے آ ڈیووس اٹی جہانی اقتصادی فورم نا سالانہ دیوان نا وخت آ اوڑدہی کرے، ہڑتوم آ راہشونک تنظیم نا پاکستان تون کمکاری نا حالیت آتا جاچ ءِ ہلکر۔ دفترخارجہ نا ترجمان نا رداٹ اوڑدہی ٹی وزیر مملکت امور خارجہ حناربانی کھر و بنجائی وزیر موسمیاتی بدلی شیری رحمان ئسک ہم ساڑی ئسر۔ وزیر خارجہ و خلیج کمکار کونسل نا سیکرٹری جنرل جی سی سی و اونا باسک ملک آتون پاکستان نا کمکاری نا حالیت آتا جاچ ءِ ہلکر۔ بلاول بھٹو زرداری اوڑدہی ٹی پاکستان و جی سی سی نا نیام اٹ تاریخی رابطہ، جغرافیائی قربت و دودوربیدگی تعلقداری تا ذکر ءِ کرےو پارے کہ پاکستان خلیج کمکار کونسل نا باسک ملک آتون ہڑتوم آ کنڈآتا و جی سی سی نا رداٹ تینا برادرانہ تعلقداری تے بھاز اہمیت ایتک ۔ وزیرخارجہ و سیکرٹری جنرل پاکستان و جی سی سی نا نیام اٹ ہڑتوم آ کنڈآتا واپاری و اقتصادی تعلقداری تے ودفنگ تون اوار اوار سٹریٹجک ڈائیلاگ کن اسیجائی ایکشن پلان نا رداٹ ادارہ جاتی رابطہ غاتے سوگو کننگ کن پین کسر پٹنگ آ امنا کریر۔ داوخت آ فریق آک پاکستان۔ خلیج کمکار کونسل فری ٹریڈ ایگریمنٹ آ زوت آن زوت مذاکرات ءِ پورو کننگ نا عزم انا درشانی ءِ کریر۔داہیت ذکر انا قابل ءِ کہ پاکستان و خلیج کمکار کونسل نا نیام اٹ دیرینہ خوشگوار تعلقداری ءِ۔ خلیج کمکار کونسل نا باسک ملک آتون پاکستان ناتعلقداری اسیجائی عقیدہ ، قدر و دودوربیدگ نا بنداو آ سوگوی اٹ گنڈوک ءُ۔