سینیٹ نا باسک آتا بھارت نا کنڈآن پنی آ کشمیری حریت لیڈر یاسین ملک ءِ دروغ انا مقدمہ ٹی سزا بِنفنگ نا مذمت

اسلام آباد۔ 25 مئی (اے پی پی) سینیٹ نا باسک آک بھارت نا کنڈآن پنی آ کشمیری حریت لیڈر یاسین ملک ءِ دروغ انا مقدمہ ٹی سزا بِنفنگ نا مذمت ءِ کرسا پارینو کہ مقبوضہ کشمیر اٹی بھارت و مقبوضہ فلسطین اٹی اسرائیل نا ظالمانہ چم آک اسہ وڑ ءُ، کشمیری تا نسل کشی ءِ کننگ انگ ءِ، آبادی نا کچ ءِ بدل کننگ انگ ءِ ، زالبول آتا عصمت دری مننگ ءِ، بھارت تون واپار ءِ ہچ ءُ حالیت اسے ٹی امنا کننگ مفک، نن کشمیر وبھارت نا بابت اسہ پیدوار پالیسی اس بایدے ایتن، مقبوضہ کشمیر اٹی انسانی حق انا لتاڑتا دنیا ٹی ہچ ءُ درور اس ملپک۔ چارشنبے نادے آ بڑزکو ایوان نا دیوان اٹی یاسین ملک نا دروغ انا مقدمہ ٹی سزا نا مذمت ءِ کرسا مسلم لیگ (ق) نا سینیٹر کامل علی آغا پارے کہ کشمیر پاکستان نا شہ رگ  ءِ، ہموڑے ظلم انا زی آ ظلم کننگ انگ ءِ ، جہانی برادری و او آئی سی دانا نوٹس ءِ ہلیر، داوخت آ ملک اٹی دزگیری و لانگ مارچ ءِ توننگ کن ہرا گام گیج آتے کننگ انگ ءِ او بے سوب ءُ۔ مسلم لیگ (ن) نا سینیٹر رانا مقبول پارے کہ مقبوضہ کشمیر نا حالیت مسلمان تا غیرت ءِ ہکل تننگ ءِ، یاسین ملک نا سزا نا برخلاف مچ آ امت مسلمہ توار بڑز کے۔ سینیٹر مشاہد حسین سید پارے کہ اسہ کینگرو کورٹ اس یاسین ملک ءِ سزا بنفینے، مقبوضہ کشمیر نا آبادی نا کچ ءِ بدل کننگ انگ ءِ، مقبوضہ کشمیر اٹی بھارت ہموکارروائی تے کننگ ءِ ہرافتے اسرائیل مقبوضہ فلسطین اٹ کننگ ءِ۔ مقبوضہ کشمیر اٹی چار لکھ پوسکن ءُ ڈومیسائل جاری کننگانے، کشمیری تا نسل کشی ءِ کننگ انگ ءِ، کشمیر نا ویل آ مچ آ قوم انا اسہ توار ءِ ۔ اوپارے کہ بھارت تون بایدے واپار مف، نن کشمیر و بھارت نا بابت پیدوار پالیسی اس بایدے ایتن، جہانی کہول آ کشمیر نا ویل و مقبوضہ کشمیر اٹی انسانی حق انا لتاڑتے تالان کننگ کن یاسین ملک نا اُرائی مشعال ملک ءِ کشمیر نا بابت خصوصی نمائندہ مقرر کننگے۔ سینیٹر عرفان صدیقی پارے کہ 73 سال آن کشمیر نا ویل ساڑی ءِ ولے اونا ایسری نا ہچ ءُ حالیت اس نظر بفننگ ءِ، داہُننگے کہ بھارت نا دروشم ءِ داخہ ظلم و بربریت آن پد ہم بے نقاب کننگ اٹ انت اکن بے سہب ءِ۔ اوپارے کہ بھارت نا 9 لکھ فوج مقبوضہ کشمیر اٹی تولوک ءِ، کشمیری تانسل کشی ءِ کننگ انگ ءِ ، انسانی حق آتے لتاڑنگ انگ ءِ  ہرانا دنیا ٹی درور ملپک، مقبوضہ کشمیر اٹی زندان تے پُر کننگانے، مودی گجرات اٹی دترنا جو تے وہیفے ، بھارت اسہ سوچ و درندگی سے نا پن ءِ، انسانیت نا قدر و مزلت تون اونا ہچ ءُ تعلق اس اف، کشمیر ننا روح، سوچ و تغ تا بشخ اسے، اونا پوری کن نن کاغد و قلم آن مون آ پیش تمسا بایدے سجفن۔ پاکستان نا داوخت انا حالیت و مقبوضہ کشمیر نا حالیت آتیٹی ہچ ءُ مماثلت اس اف۔ سینیٹر دنیش کمار پارے کہ یاسین ملک نا جہد ءِ سلام پیش کینہ، کشمیر نا باندات  آسیاسی اختلاف ءِ  گیرام کرسا بایدے اسٹ مرین۔ سینیٹر تاج حیدر پارے کہ پاکستان نا الس مظلوم کشمیری ایلوتتون سلوک ءِ ، بھارت مقبوضہ کشمیر اٹی مسلمان تا نسل کشی ءِ کننگ ءِ ۔