لاہور اٹی تحریک انصاف نا عہدیدار آتا سلہہ غاتیان پُر مسہ گاڈی ہلنگانو، سینیٹ اٹی قائد ایوان اعظم نذیر تارڑ

اسلام آباد۔ 25 مئی (اے پی پی) سینیٹ اٹی قائد ایوان اعظم نذیر تارڑ پارینے کہ لاہور اٹی تحریک انصاف نا عہدیدار آتا سلہہ غاتیان پُر مسہ گاڈی ہلنگانو، سینیٹر اعجاز چوہدری نا دزگیری نا حوال ملنگ تون صوبائی حکومت تون رابطہ کرینن، اعجاز چوہدری تینا اُراغا سرمسنے، غٹ پارلیمنٹ نا باسک آک ننکن شرفمند ءُ، ملک اٹی ہڑدڑ ودی کننگ نا کوشست کننگ انگ ءِ، جتھہ بندی کرسا اسلام آباد آ کوزہ کننگ کن ہلنگ پننگک، رانا ثناءاللہ ءِ انسداد دہشت گردی نا عدالت ماڈل ٹاؤن مقدمہ غان بری کرے، لاہور ہائی کورٹ ہم فیصلہ ءِ بحال تخا۔ چارشنبے نادے آ بڑزکو ایوان اٹی سینیٹر ہمایوں مہمند ، فدامحمد خان دوست محمد خان وا یلو باسک آتا ٹک آتا ورندی ءِ ترسا اوپارے کہ میڈیا غا سینیٹر اعجاز چوہدری نا دزگیری نا خبر ملنگ تون حکومت تون رابطہ کرین و پارین کہ او تینٹ بسوسس، نن سیاسی مخالفت آتیان بیر ہلنگ آ یخین تخپنہ، وزیراعظم تون سلابت آن پد ای ہیت کننگ اُٹ، سینیٹر اعجاز چوہدری داتم اسکان تینا اُراغا سرمروئے، درو لاہور اٹی سلہہ غاتیان پُرمسہ گاڈی ہلنگانو، اوپی ٹی آئی لاہور ڈویژن نا عہدیدار آتا ئسر، پارلیمنٹ نا باسک آک ننکن شرفمند ءُ ہراتم اسکان کس اس کانود یا آئین نا خلاف ورزی ءِ کپک اونا برخلاف کارروائی مفک، لاہور اٹی پولیس کارندہ ءِ پی ٹی آئی نا کارندہ غاک شہید کرینو، وزیراعلیٰ زہمی خاہوت ءِ انصاف فراوان کننگ نا یخین دہانی کرفینے، سیاست نا عملداری ءِ امنا کننگے، ماڈل ٹاؤن واقعہ نا مدعی تا درخواست آ انسداد دہشت گردی نا عدالت اٹی 53 گواہ تا بیان ریکارڈ مس ہراٹی رانا ثناءاللہ ءِ بری کننگا، لاہور ہائی کورٹ ہم ہمو فیصلہ ءِ بحال تخا، السی تحریک سپریم کورٹ تون ہم رجوع کرے ولے اودے ہموکان ہم ریلیف ملتنے۔ اوپارے کہ ملک اٹی ہڑدڑ ودی کننگ نا کوشست کننگ انگ ءِ، 2014 ٹی او ادارہ غاتیا چڑھائی کرے، داقومی اسمبلی آن نرانے، الس اودے وونٹ تسوسس، اوبایدے اسمبلی ٹی تولوسس۔ وزیر داخلہ رانا ثناء اللہ قومی اسمبلی و کابینہ نا باسک ءِ، کس اسے نا ساڑی مفننگ اٹی غیر پارلیمانی لوز آتا کاریم اٹ اتنگ زیب تفک، 2014 ٹی ہرافلم ءِ چلیفنگاسس اودے کس اس است آن دتنے۔