وزیرخارجہ بلاول بھٹو زرداری نا سینئر کشمیری راہشون یاسین ملک نا دمدستی یلہ کننگ نا خواست

اسلام آباد۔ 24 مئی (اے پی پی) وزیر خارجہ بلاول بھٹو زرداری سینئر کشمیری راہشون محمد یاسین ملک ءِ بھارتی عدالت نا کنڈآن جعلی دوبہ غاتیا فرد جرم بیٹ کننگ نا ترندی اٹ مذمت ءِ کرسا اونا دمدستی یلہ کننگ نا خواست کرینے، بھارت ءِ مقبوضہ کشمیر اٹی جہانی کانود نا خلاف ورزی کننگ ناموکل تننگ نا بھلو انسانی نتیجہ اس دوئی مریک۔ سے شنبے نادے آ وزارت خارجہ نا ترجمان نا کنڈآن جاری بیان نا رداٹ وزیرخارجہ بلاول بھٹو زرداری پارے کہ محمد یاسین ملک آ خلوک آ سٹی آ دوبہ غاتے چٹفسا اودے دمدستی وڑاٹ یلہ کننگے۔ اوبھارتی عدالت نا کنڈآن محمد یاسین ملک آ غلط فرد جرم بیٹ کننگ نا ترندی اٹ مذمت ءِ کرسا پارے کہ یاسین ملک غیرکانودی وڑاٹ کوزہ گیری ٹی جموں و کشمیر اٹی حریت راہشون تیٹی غٹ آن نمان و شرف نا قابل توار ءِ، بھارت اودے دمدستی وڑاٹ یلہ کے و اودے تینا خاہوت تون دُوارہ ملنگ نا موکل تننگے۔ اوپارے کہ عشرہ غاتیان برجا بھارتی جور انا برخلاف اونا پکا عزم ءِ داوڑنا غیر منصفانہ فیصلہ غاتے اٹ متزلزل کننگ مفک۔ وزیرخارجہ پارے کہ بھارت مقبوضہ کشمیر اٹی غٹ سیاسی بندی تے یلہ کننگ و انسانی حق انا سنگین خلاف ورزی تے بایدے ہلے، بھارت  جوان چاہے کہ او کشمیری الس ءِ اوفتا حق خودارادیت نا کاریم اٹ اتنگ آن ہمیشہ کن توننگ کپک  ہرااوفتے اقوام متحدہ نا سلامتی کونسل نا قرراداد آتا رداٹ تننگانے۔ اوجہانی برادری ، اقوام متحدہ و انسانی حق انا تنظیم تیان خواست کرے کہ اوفک بھارت ءِ محمد یاسین ملک تون مروک آ دا سنگین نا انصافی ءِ توننگ کن تینا کڑد ءِ ادا کیر۔ وزیرخارجہ پارے کہ جہانی برادری ءِ دا پہہ مرے کہ اگہ بھارت ءِ مقبوضہ کشمیر اٹی جہانی کانود ناخلاف ورزی کننگ نا موکل تننگا تو اونا سنگین نتیجہ دوئی مریک۔