کمال احمد نا خونی عمران و اونا حواریک ءُ، مارچ انا آڑاٹ خانہ جنگی نا سازش مننگ ءِ، وزیر داخلہ

اسلام آباد ۔ 24 مئی (اے پی پی) وزیرداخلہ رانا ثناء اللہ خان پارینے کہ بے گناہ پولیس کارندہ کمال احمد نا سینہ ٹی لگوک آ سم شاہدی ءِ کہ عمران خان دہشت گرد اسے، کمال احمد نا خونی عمران خان، شیخ رشید و اونا حواریک ءُ، عمران خان مارچ انا آڑ اٹ ملک اٹی خانہ جنگی نا سازش کننگ ءِ۔ سے شنبے نادے آ وزارت داخلہ غان جاری بیان نا رداٹ اوپارے کہ ’’خونی مارچ مریک‘‘ نا پڑو کروک آتیان حساب ہلینہ۔ پولیس آ سم کاری آن دا ہیت پک مسنے کہ دا سیاسی سرگرمی اس اف و داپرامن مارچ خواتورہ۔ کرینگ آتا پِرکروک آک سم تا پِر کننگ نا بناءِ کرینو ، کانود ءِ دوٹی ہلنگانے۔ کمال احمد نا خونی تے کانود نا رداٹ سزا ایتنہ۔ اوپارے کہ ملک اٹی خانہ جنگی، ہڑدڑ، پھسات و بے چیٹی ءِ کانودی کسر اٹ تورنہ۔ شہید پولیس کارندہ ناخاہوت ءِ شہید پیکج ایتنہ۔ شہید کارندہ نا خاہوت ناولفنگ و چناتا تعلیم نا زمواری ءِ حکومت ہلیک۔ الس نا جان و مال انا رکھ انا فرض ءِ پورو کینہ۔ وزیر داخلہ شہید پولیس کارندہ نا خاہوت تون ہڑزخواہی و ہمدردی نا درشانی ءِ کرینے۔ اودعاکرے کہ اللہ تعالیٰ شہید انا درجہ غاتے بڑز کے، خاہوت ءِ صبر و جمیل ایتے۔