لاہور اٹی پولیس کارندہ غا سم کاری کرسا خیسن انگا لکیر ءِ پار کننگا، زرگزران و الس ءِ بچفنگ کن ریڈلائن خلنگ ناوخت بسنے، بنجائی وزیر حوالکاری مریم اورنگزیب

اسلام آباد۔ 24 مئی (اے پی پی) بنجائی وزیر حوالکاری و شینکاری مریم اورنگزیب پارینے کہ لاہور اٹی پولیس کارندہ کمال احمد آ سم کاری کرسا خیسن آ لکیر ءِ پار کننگا، میڈیا سیاسی سرجزآتا کوریج ءِ کے ولے شرپسندی ، بیدادی و دہشت گردی تالان کروک آ سرجزآتا بائیکاٹ کے، وزیراعظم شہباز شریف زرگزران و الس نا رکھ ءِ کننگ نا دوٹوک ارادہ نا درشانی ءِ کرینے، پاکستان نا زرگزران و الس ءِ بچفنگ کن ریڈلائن خلنگ نا وخت بسنے، زرگزران نا بحالی و الس نا ریلیف نا کسر اٹ خیسن ءُ لکیر اس چکانن، کس اسے اوڑآن گدرینگ انگ نا موکل تفنہ۔ سے شنبے نادے آ تینا اسہ بیان اسے ٹی اوپارے کہ پاکستان نا زرگزرانی وتواجہی ءِ بچفنگ نا جنگ اٹ سرسہبی کن سیاسی سوگوی بنداوی گرج ءِ۔ اوپارے کہ پاکستان ءِ بھس کروک ہنوک آ تے پین بھسکاری تالان کننگ نا موکل تننگ مفک۔ زرگزران و الس نا رکھ آ ہچ ءُ سمجھوتہ اس کننگپک۔ بنجائی وزیر حوالکاری پارے کہ زرگزران ہراتم کہ ٹیک آف کننگ لگک ، عمران صاحب نا شرپسندی اونا کسر اٹ اڑاند مریک۔ اوپارے کہ سی پیک بس، عظیم سنگت صدر شی جن پنگ پاکستان آ بننگ نا پڑو کرے تو دھرنا نا پڑو مسوسس۔ اینو پاکستان نا زرگزران نا بحالی و الس ءِ ریلیف تننگ نا بناءِ کرینن، ہچ ءُ نیام تمنگ اسے سگنگ مفک۔ زرگزران و الس نا ریلیف اسہ ٹکی ایجنڈا ءِ، داڑآ ہچ ءُ سمجھوتہ اس مفک نئے داڑآ جلہو ءِ سگنہ۔ اوپارے کہ اینو الس ءِ ہم فیصلہ کروئی ءِ کہ دُز و فسادی ٹولی تون سلوئی ءِ یا ملک انا جوڑ کننگ تون، الس نا اولیت تفنگ، شونداری و شونہالی ءِ۔ اوپارے کہ دا شرپسند و فسادی تیان الس ءِ بچفنگ کن ہرگام گیج ءِ کننگ انگ ءِ، ملک اٹی زرگزران نا بحالی، کبینی ٹی کمتی و روزگار نا بحالی نا کسر اٹ سازش ءِ اڑاند مننگ کن الیپنہ۔