سینیٹ ، عمران خان تینا شکست ءِ امنا کے، پی ٹی آئی ڈکٹیٹ کننگ کپک، یوسف رضاگیلانی

اسلام آباد۔ 24 مئی (اے پی پی) مسکوہی وزیراعظم سینیٹر یوسف رضاگیلانی پارینے کہ عمران خان تینا شکست ءِ امنا کے، آخیریکو گیند اسکان مون تروک آ وکٹ آتے ہرفسا نرا۔ سے شنبے نادے آ بڑزکو ایوان اٹی گپ وتران کرسا اوپارے کہ اینو قائد حزب اختلاف دزگیری تا ہیت ءِ کیک، انت اودے مریم نواز، خورشید شاہ و حمزہ شہباز ءِ ہراوڑ دزگیر کننگا او گیرام کرے، ملتان اٹی پی ڈی ایم نا جلسہ ٹی ہرااڑاند آتے شاغنگا او غٹ ءِ یات ءِ، پی ٹی آئی 120 دے دھرناتس ولے اسٹ اس ہم اڑاند شاغتو ، پی ٹی آئی ڈکٹیٹ کننگ کپک کہ گچین کاری تے ہراتم کرفنگے۔ اوپارے کہ مسکوہی وزیراعظم نا برخلاف بے پتی نا تحریک کانود و آئین نا رداٹ منظور مس ، ہرا سیوتیک اودے اِلار اوفتے غدار گوندنگ ءِ، عمران خان تینا شکست ءِ امنا کے ، اینو ڈیوڈ لوآن ہم او استیفہ خواہنگ ءِ ، پگہ جوبائیڈن آن ہم استیفہ خواہنگ کیک۔