چاگڑدی بدلی تا بابت بھسکاری نا دنگ آ سلوک اُن، سینیٹر شیری رحمان نا ڈیووس اٹی تران

اسلام آباد۔ 24 مئی (اے پی پی) بنجائی وزیر چاگڑدی بدلی سینیٹر شیری رحمان پارینے کہ نن چاگڑدی بدلی نا بابت بھسکاری نا دنگ آ سلوک اُن، ولے جہانی راہشون قول آتیان مون آ ہُنپننگ ءُ، جمہوریت ہی حکمرانی نا اسٹ انگا وڑوڈول ءِ  ہراٹی الس و امنائی سلاہ اوار مریک۔ داخیال آتا درشانی ءِ او ڈیووس اٹی برجاورلڈ اکنامک فورم اٹی ’’فیوچر آف ڈیموکریسی‘‘ نا سرحال آن اسہ دود اسے آن تران کرسا کرے۔ بنجائی وزیر پارے کہ جمہوریت آ حقی شرہ مفننگ ءِ ہراکہ مروئی ئسک، مچ آ دنیا ٹی ودو ک آ بے بریبری نا پیدواری ءِ کننگتو، سویل و دیکی نا نیام اٹ پرخ ودنگ ءِ۔ شیری رحمان پارے کہ آمرانہ نظام اسہ گڑاسے نا ہم گچین ایسر مننگ کپک، پاکستان کون آ پیچیدہ و کثیر دودوربیدگی ملک انا ویل آتا جمہوریت ہی اسٹ انگا ایسر ءِ، جمہوریت نزور تپہ غاتا نمائندگی و رکھ ءِ کیک، جمہوریت اٹی سوج، شفافیت و جوابدہی نا عمل مریک۔ اوپارے کہ آمرانہ حکومت آک زیات امداد دوئی کیرہ ولے او امنائی سلاہ غا جوڑمفسہ، جمہوریت ہی زند و حکمرانی نا اسٹ انگا وڑوڈول ءِ ہراٹی الس نا امنائی سلاہ اوار مریک۔ شیری رحمان پارے کہ یوکرین روس جنگ دنیا ٹی وسیلہ غاتا تنکی ودکی کیک، داوخت آ ہراسٹ یوکرین و روس جھیڑہ غا ہیت کننگ ءِ۔ بنجائی وزیر پارے کہ اوغانستان و عراق اٹی انسانی تنکی نا بارواٹی دنیا نا انت خیال ءِ؟ دانا زمواری ءِ کس اس انت اکن ہلپننگ ءِ؟ انت اوغانستان، شام و عراق نا پناہ گزین یورپی باتی تیان کم انسان ءُ؟۔ اوپارے کہ قدر  غٹ اکن بایدے بریبر مرے ، نن چاگڑدی بدلی نا بابت بھسکاری نا دنگ آ سلوک اُن ولے جہانی راہشون قول تیان مون آ ہِنپننگ ءُ، زیات کچٹی ودی کروک آ بھلا کمپنیک راجی زمواری نا درشانی ءِ کیر۔