وزیراعظم شہباز شریف نا حریت راہشون یاسین ملک ءِ دہشت گردی نا جعلی مقدمہ ٹی اوار کننگ نا مذمت، جہانی برادری آن نوٹس ہلنگ نا خواست

اسلام آباد۔ 23 مئی (اے پی پی) وزیراعظم شہباز شریف پنی آ حریت راہشون محمد یاسین ملک ءِ دہشت گردی نا جعلی مقدمہ ٹی اوار کننگ نا گام انا ترندی اٹ مذمت ءِ کرسا پارینے کہ جہانی برادری خاص وڑاٹ اقوام متحدہ و انسانی حق انا کونسل کانود و انصاف آن ایڑتر و بیر ہلنگ آ مبنی بھارتی گام انا نوٹس ءِ ہلیر، پاکستان نا حکومت و الس کشمیری تا انصاف اٹ جہد نا ہرممکن مخ تفی ءِ برجاتخرہ۔ دوشنبےنادے آ وزیراعظم آفس نا میڈیا ونگ آن جاری بیان نا رداٹ وزیراعظم پارے کہ بے مٹ نرزوری و حریت نا نشانی و ضمیر نا بندی یاسین ملک نا برخلاف بھارتی چم آتے مسترد کینہ ، دا کشمیری تا کاٹم ءِ شیف توننگ نا بے سہب کوشست اسے، جہانی برادری خاص وڑاٹ اقوام متحدہ و انسانی حق کونسل کانود وانصاف آن ایڑتر و بیر آ مبنی بھارتی گام انا نوٹس ءِ ہلیر۔ حکومت پاکستان انسانی حق انا غٹ ادارہ و او آئی سی نا فورم آ یاسین ملک و کشمیری سرکڑدہ غاتا برخلاف انتقامی کارروائی تے پورو قوت اتون ہرفک۔ اوپارے کہ 5 اگست 2019 ء نا ناروا و غیرکانودی گام گیج آنبار یاسین ملک نا برخلاف مقدمہ ہم غیرکانودی وناروا ءِ۔ جموں و کشمیر آ ناروا کوزہ کروک آ بھارت کشمیری تا نمائندہ حقی سرکڑدہ ئی ءِ چٹفنگ نا سجفوک ڈٹ بندی آ عمل کننگ ءِ۔ اوپارے کہ آزادی کشمیرنا نشانی سید علی گیلانی شہید نا میت آن خلوک آ بھارت یاسین ملک نا حق گوئی آن خوفزدہ ءِ۔ اشرف صحرائی شہید، اونا شہید مار اتون اوار ہزار آ کشمیر نا شہید آک استصواب رائے نا دوئی کننگ نا مزل نا نشان ءُ۔ دا غٹ شہید آک جموں وکشمیر اٹی غیر کانودی وڑاٹ کوزہ گیر بھارت نا ظلم و بربریت و ریاستی دہشت گردی نا شاہدی ءُ۔ مچ آ دنیا چاہک کہ بھارت نا تہار کانود و عدالتی نظام عدل نا جہانی و فطری خواست آتیان چپ ءِ۔ مسلمہ تاریخی حقیقت اسے کہ اسہ قوم اسے ہم جور و ریاستی دہشت گردی ، تہارکانود و سزا تے اٹ غلام جوڑ کننگ مفک، ناروا حکومت نا تہار کانود آن بھارت نا غیر کانودی کوزہ گیری ٹی جموں وکشمیر نا الس ءِ غلام کننگ مفک۔ وزیراعظم پارے کہ دلیر کشمیری تے اوفتا بے مٹ جہد آ سلام پیش کینہ ہرافک دا مسخت کن عظیم ءُ قربانی تسنو۔ جہانی برادری اقوام متحدہ نا سلامتی کونسل نا قرارداد و کشمیری تا است خواہی نا رداٹ جموں و کشمیر نا جھیڑہ ءِ ایسر کرفے۔ پاکستان نا حکومت و الس کشمیری تا انصاف اٹ جہد نا ہرممکن مخ تفی ءِ برجاتخرہ۔