اسلام آباد۔ 23 مئی (اے پی پی) وزارت مذہبی امور پوسکن آ حج پالیسی نا مسودہ ءِ منظوری کن بنجائی کابینہ غا گدریفینے۔ بنجائی کابینہ غان حج پالیسی نا منظوری آن پد پوسکن آ حج پیکج نا پڑو ءِ کننگک۔ حوالی نا رداٹ سعودی عرب نا کنڈآن حج خڑچ آتا سرجم ءِ وزارت مذہبی امور آ گدریفنگانے۔ جہانی کہول آ کبینی ، شرح مبادلہ ٹی ودکی، سعودی عرب اٹی مستین نا مقابلہ ٹی پوسکن آ خراج آتا نفاذ، حج خڑچ آتیٹی ودکی نا سوب مریک۔ مہالو ہراڑے المی حج خڑچ آک 2 ہزار ریال ئسرہ داسہ دا ودسا 6 ہزار ریال اسکان سرمریرہ۔ ریال نا نہاد مہالو 38 روپئی ئس داسہ دا ودسا 52 روپئی مسنے۔ اندیشہ ظاہر کننگ انگ ءِ کہ اینخو سال سرکاری اسکیم نا رداٹ حج پیکج 8 لکھ روپئی آن گدرینگک ولے دا بابت گڈیکو فیصلہ اس بنجائی کابینہ کیک۔ پوسکن آ حج پالیسی نا مسودہ ءِ منظوری کن بنجائی کابینہ غا گدریفنگانے۔ بنجائی کابینہ نا سلاہ و سوج آتے مون آ تخسا گڈیکو حج پالیسی نا پڑو ءِ کننگک۔
