کراچی۔ 20 مئی (اے پی پی) وزیراعظم شہباز شریف پارینے کہ پاک ترک تعلقداری تے پوسکن آ بڑزی تسکان دننگ بناکرینے، ہڑتوم آ ملک آک ہر مشکل ساہت اٹی اسہ ایلو تون پبی تفینو، پی این ایس بدر پاکستان و ترکی نا شریداری نا گچین ءُ درور اسے، زوت پاکستان نا شونداری و شونہالی ٹی ترکی نابھلو بشخ اس مریک، سی پیک ڈٹ علاقائی رابطہ غاتا مون آ دننگ کن بھاز اہم ءِ۔ اوداخیال آتا درشانی ءِ جمعہ نادے آ داڑے کراچی شپ یارڈ اینڈ انجینئرنگ ورکس اٹی پاک بحریہ نا مسٹ میکو ملجم کلاس کارویٹ بحری جہاز پی این ایس بدر نا لانچنگ دود آن تران کرساکرے۔ بحری جہاز ترکی نا ایم ایس اسفات نا کمک اٹ کراچی شپ یارڈ اٹی تیار کننگانے۔ وزیراعظم پارے کہ دادود اٹی بشخ ہلنگ کنکن شرفمندی اسے ، پاک بحریہ نا سروک ، ترک کمپنی و شپ یارڈ انا عملہ ءِ دا عظیم سرسہبی آ مبارکبادی پیش کیوہ۔ اوپارے کہ پی این ایس بدر پاکستان و ترکی نا شریداری نا گچین ءُ درور اسے ، پاک ترک تعلقداری تے پوسکن آ بڑزی تسکان دننگ بناکرینے ، ترکی ناصدر رجب طیب اردوان پاکستان نا ایلم و سنگت ءِ و او پاکستان کاز انا بھلا مخ تف ءِ، اونا دور اٹی ہڑتوم آ کنڈآتا برادرانہ تعلقداری تے سوگوی دوئی مسنے و ننا تعلقداری خارجہ پالیسی آن جہاز جوڑ کننگ و ٹرانسپورٹ آن جان جوڑی نا بشخ آتسکان تالان مسنے و ہڑتوم آ کنڈآتا تعلقداری تے تین پہ تینی فائدہ کن نن عظیم بڑزی تیا دینہ، پی این ایس بدر نالانچنگ آن پاک ترک تعلقداری تیٹی پوسکن آ درو بناکرینے، پاکستان و ترکی اسہ قوم اسے ءُ ہرا اِرا جتا ملک آتیٹی رہینگرہ، کورونا ٹی جہاز نا تیاری ہڑتوم آ ملک آتا بھلو سرسہبی اسے و پاک بحریہ و ترکی نا کمپنی تا نیام اٹ کمکاری آن ننا تعلقداری پین سوگو مریک و نن ترکی نا مہارت و ٹیکنالوجی آن فائدہ ہرفنہ۔ پاکستان نا مریس کرکی پٹی اسے، واپاری و صنعتی سرجزآتے مون آ درسا نن مون آ ہِننگ کینہ۔ اوپارے کہ سی پیک ڈٹ علاقائی رابطہ غاتا مون آ دننگ کن بھاز اہم ءِ و گوادر دانا مرکز جوڑ مننگ ءِ، سی پیک ءِ ترکی و ایران اسکان ودفنگ مریک، ترکی تون برصغیر نا مسلمان تا تعلقداری پاکستان آن جوڑ مننگ آن مست ءِ و زوت پاکستان نا شونداری و شونہالی ٹی ترکی نا بھلو بشخ اس مریک۔ اوپارے کہ ترکی 2005 نا زمی جمب و 2010 نا نوکاپ نا بھسکاری تیان پد پاکستان نا پبی کمک ءِ کرے و صدر رجب طیب اردوان و اونا اُرائی نوکاپ آن زہمی علاقہ غاتا دورہ ءِ ہم کریسر ، داننا تاریخ نا ہمو یات گار وخت آک ءُ ہرافتے فراموش کننگ مفک۔ داوخت آ وزیراعظم کراچی شپ یارڈ اینڈ انجینئرنگ ورکس انا عملہ کن 10 کروڑ روپئی نا ہم پڑو کرے۔
