اسلام آباد۔ 20 مئی(اے پی پی) بنجائی وزیر انسداد منشیات نوابزادہ شاہ زین بگٹی پارینے کہ سوئی و ڈیرہ بگٹی نا الس ءِ جان جوڑی و دیر تون اوار ایلو بنداوی آسراتی تا فراوانی کن ہلہلہ ئی بنداو آ گام گیج کننگ انگ ءِ، صوبائی حکومت باور کرفینے کہ دیر انا ڈٹ ءِ اِراتُواٹی پورو کننگک وخت اس کہ ڈبلیو ایچ او نا کنڈآن تھیلیسمیاسنٹر نا جوڑ کننگ نا پڑو، دوائی تا فراوانی وایمبولینس عطیہ کننگانے، ہندی ہسپتال آتے درکار ازباب آتا فراوانی کن نیشنل ہیلتھ سروسزنا وزارت نا کنڈآن باورہم کرفنگانے۔ داخیال آتا درشانی ءِ جمعہ نادے آ بنجائی وزیر انسداد منشیات نوابزادہ شاہ زین بگٹی ڈبلیو ایچ او نا کنٹری ہیڈ ماہی پالا پالیتھا و وزارت جان جوڑی نا کمامدار آتون اوار ڈیرہ بگٹی نا زہمی علاقہ غاتا دورہ ءِ کننگ آن پد میڈیا تون گپ وتران کرسا کرے۔ داوخت آ چیف سیکرٹری عبدالعزیز عقیلی تون اوار ایلو تعلقدار ادارہ غاتا کمامدارآک ہم ساڑی ئسر۔ چیف سیکرٹری بنجائی وزیر ءِ دیر و جان جوڑی نا آسراتی تا بابت حوال تس۔ داوخت آ گپ وتران کرسا بنجائی وزیر شاہ زین بگٹی پارے کہ پیرکوہ ٹی دیر انا بھاز کاختی ءِ ہراتم اسکان دیر سپلائی نا ڈٹ پورو مفک ہموتم اسکان ہندی انتظامیہ مسہ لکھ شست ہزار لیٹر ہڑدے ئی بنداو آ دیر فراوان کننگ ءِ و نن دا ادارہ غاتا منت واری ءِ ہرفنہ۔ چیف سیکرٹری نا کنڈآن پاننگاکہ دیر انا ڈٹ اِرا تُو اٹی پورو کننگک و ننے باور کرفنگانے ہراتم اسکان دیر انا ڈٹ پورو مفک ہڑدے ئی چار لکھ لیٹر دیر فراوان کننگک۔ اوپارے کہ باسنی ٹی ودکی مننگ ءِ ہیٹ ویو ٹی دیر انا وخت آ فراوانی نا کمک اٹ مخلوق نا کمک ءِ کننگ مریک۔ بنجائی وزیر پارے کہ ڈبلیو ایچ او نا ٹیم ڈیرہ بگٹی ٹی تھیلیسمیا سینٹر اس جوڑ کننگ نا پڑو کرینے۔
