اسلام آباد۔ 20 مئی (اے پی پی) وزیرخارجہ بلاول بھٹو زرداری نیویارک نا 3 دے ئی دورہ غان پد اسلام آباد آ روانہ مس۔ پاکستان آ روانگی نا وخت آ وزیرخارجہ ءِ اقوام متحدہ ٹی پاکستان نا آخبتی مندوب منیر اکرم و امریکہ ٹی پاکستان نا سفیر مسعود خان آن بیدس اقوام متحدہ ٹی پاکستان نا نائب آخبتی مندوب عامر خان ئسک سپارار۔ وزیرخارجہ دورہ ٹی خور انا سلامتی نا بابت امریکہ نا مہمانداری ٹی مروک آ بڑزکو کہولی دیوان تیٹی بشخ ہلک ، ہرا یوکرین آ روس انا جلہو نا سوب آن پین ودانے۔ وزیرخارجہ امریکہ ٹی اڈکننگ نا وخت آ گڑاس اہم سفارتکار آتون اوڑدہی ہم کرے۔ بلاول بھٹو زرداری پوسکن آ کابینہ ٹی وزیرخارجہ نا عہدہ ءِ سنبھالنگ آن پد امریکہ نا مسہ دے ئی اختہ دورہ کرے۔ امریکہ ٹی اڈکننگ نا وخت آ اواقوام متحدہ نا سیکرٹری جنرل انتونیوگوتریش، امریکی وزیر خارجہ انٹونی بلنکن، اقوام متحدہ نا جنرل اسمبلی نا صدر عبداللہ شاہد و اٹلی و ترکی تون اوار چندی ملک آتا وزرائے خارجہ غاتون اوڑدہی کرے ہرافتے ٹی او پاکستان نا نقطہ نظر ءِ مون آ تخا و پوسکن آ حکومت نا پالیسی تا اولیت آتا ذکر ءِ کرے۔
