اسلام آباد۔ 20 مئی (اے پی پی) قومی اسمبلی ءِ وزارت انفارمیشن ٹیکنالوجی نا کنڈآن پاننگانے کہ داوخت آ ملک انا 89 درسد بشخ اٹی فورجی ٹیکنالوجی فراوان کننگ انگ ءِ، بروک آ شش تُو اسکان مچ آ ملک اٹی فورجی ٹیکنالوجی نا نیٹ ورک ءِ پورو کننگک۔ جمعہ نادے آ قومی اسمبلی ٹی وقفہ سوج آتیٹی ڈاکٹر شازیہ ثوبیہ نا سوج انا ورندی ٹی وزیر پارلیمانی امور مرتضیٰ جاوید عباسی پارے کہ مسلم لیگ (ن) نا مسکوہی حکومت فورجی نا آسراتی نا بناءِ کریسس۔ اوپارے کہ ملک اٹی داوخت آ 89 درسد بشخ اٹی فورجی نا آسراتی ساڑی ءِ۔ مہالو کمپنی تون ضلع و تحصیل ہیڈکوارٹر نا کہول آ فورجی نا سراتی تا فراوانی نا آسراتی نا معاہدہ 15 سال انا ئس ۔ ملک انا داتم اسکان 11 درسد بشخ فورجی آن محروم ءُ۔ ڈاکٹر روشن نا سوج انا ورندی ٹی بنجائی وزیر پارے کہ بروک آ شش تُو اسکان ملک انا ہربشخ اسکان فورجی نا آسراتی ءِ فراوان کننگک ولے سٹریٹجک لحاظ اٹ ہراڑے ہراڑے پابندی مریک ہموڑے دا دے فراوان کننگپک۔ نوشتہی ورندی ٹی پاننگاکہ وزارت انفارمیشن ٹیکنالوجی، ٹیلی کمیونیکیشن و پی ٹی اے ایلو فریق آتا سلابت اٹ فائیو جی ٹیکنالوجی کن پالیسی گائیڈ لائن تے گڈیکو دروشم اس تس ولے دا بابت داتم اسکان ہچ ءُ سلابتی خذمت اس دوئی کننگتنے۔
