اسلام آباد۔ 20 مئی (اے پی پی) بنجائی وزیر چاگڑدی بدلی شیری رحمان پارینے کہ ساف و گیگ بدل توانائی نا فراوانی آ پبی چکار کننگ نا گرج ءِ۔ پاکستان چاگڑد دوست توانائی نا بابت جہانی کہول آ قول کرینے۔ جمعہ نادے آ قومی اسمبلی ٹی وقفہ سوج آتیٹی طاہرہ اورنگزیب نا سوج انا ورندی ٹی بنجائی وزیر شیری رحمان ایوان ءِ پارے کہ کلین انرجی کن گام گیج برجاءِ۔ داوخت آ70 درسد تھرمل کن کولاءِ کاریم اٹ اتنگ انگ ءِ ہراڑآن چاگڑد ءِنسخان مننگ ءِ۔ داوخت آ توانائی نا پیدوار اٹی ساف توانائی نا بشخ 32 درسد ءِ وخت اس کہ 68 درسد میلی توانائی ءِ۔ بنجائی وزیر پارے کہ کولاغان چلینگوک آ 11 آن 6 پاور پلانٹ داوخت آ پریشنل ءُ۔ پاکستان 2030 ء اسکان 60 درسد گیگ بدل توانائی آ گدریفنگ نا قول کرینے۔ ننتون وسیلہ ارے۔ داوخت آ تہو آن اسہ درسد و سولر آن 16 درسد بننگ کیک۔ جم پیر ٹی زرکاری نا کسر اٹ اڑاند شاغنگپ۔ بنجائی وزیر شیری رحمان پارے کہ داوخت آ تحفظ ماحولیات ایجنسی نا ہچ ءُ کڑد اس اف۔ او تینا ویل آتیٹی اختہ ءِ، مچ آ وزارت اٹی ویل ءِ۔ اوپارے کہ 20 ہزار خشت بھٹہ غاتیٹی کلین انرجی کن گام گیج کننگ انگ ءِ۔ وزارت اٹی کلین انرجی نا بابت ہم کاریم مننگ ءِ۔ اینو جرمنی نا ڈل ہم دا چرجوئی ٹی بننگ ءِ۔ اوکان پد ڈپٹی اسپیکر باندات ءِ تعلقدار کمیٹی نا دوٹی تس۔
