اسلام آباد۔ 20 مئی (اے پی پی) پارلیمانی امور نا بنجائی وزیر مرتضیٰ جاوید عباسی پارینے کہ زیر التواء آڈٹ پیراز آ کارروائی پورو مننگ اسکان کس اسے نا برخلاف کارروائی مننگ کپک۔ جمعہ نا قومی اسمبلی ٹی سوج آتیٹی مولانا عبدالاکبر چترالی نا سوج انا ورندی ٹی اوایوان ءِ پارے کہ احتساب آن بیدس اسہ ادارہ اس ہم چلینگ کپک۔ اوپارے کہ تعلقدار ممبر نا اگہ خاص ءُ کیس اسے نا بارواٹ معلومداری فراوان کننگ خوائے تو کننگ کیک، وزارت اوڑآ کارروائی کیک۔ ضمنی سوج آ اوپارے کہ زیر التوا آڈٹ پیراز آ ہراتم اسکان کارروائی پورو مفک ہمووخت اسکان کس اسے سزا تننگ مفک۔ ڈاکٹر ثوبیہ اسلم سومرو نا سوج آ بنجائی وزیر ایوان ءِ پارے کہ اسکول آتیٹی طالب علم آتا داخلہ نا کچ اٹی ودکی کن گام گیج کننگ انگ ءِ۔ تعلیم صوبہ غاتا مینڈیٹ ءِ ولے بنجائی حکومت ہم دا بابت تینا کڑد ءِ ادا کیک۔
