اسلام آباد۔19مئی (اے پی پی): مزن وزیر شہباز شریف ءَ گوں چین ءِ ایکسٹرنل سیکورٹی کشمنر چنگ جوپنگ ءِ سروکی ءَ ڈل ءَ پنچ شمبے ءِ روچ ءَ ادا گند ءُ نند کت۔مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ پاکستان ءِ درئی پالیشی آنی تہ ءَ چین ءِ ارزشت ءَ را سہرا کنان ءَ پاکستان ءُ چین ءِ نیام ءَ یکجائی کمک ءُ شریکداری آناں گیش مھکم جوڑ کنگ ءِ جزم ءِ درشان کت۔ مزن وزیر ءَ پاک ۔ چین اقتصادی راہداری ءِ چیر دستی ءَ جاڑیگیں ءُ نو کیں منصوبگ آنی سر ءَ گوں ترندی ءَ کار کنگ ءِ ھوالگ ءَ وتی حکومت ءِ جزم ءِ درشان کت۔ آئی ءَ گوشت کہ پاک۔ چین اقتصادی راہداری ءَ پاکستان ءِ چاگردی ءُ اقتصادی دیمروئی ءَ باز ارزشتی ایں کرد پیلو کتگ ءُ ایشی ءِ وسیلگ ءَ مزن تکی کد ءُ بالادی دیمروئی ءَ پکوئیں رنگ رستگ۔ مزن وزیر ءَ ام ایل ون منصوبگ ءَ ھوار دوئیں ملک آنی کوئی آنی ارزشتی ایں منصوبگ آنی ھوالگ ءَ نوکیں جوش ءُ جوزگ ءَ گوں کار کنگ ءِ جزم ءِ درشان کت۔ مزن ویزر ءَ گوشت کہ پاکستان ءُ چین ءِ یکوئی وت مہ وتی تپاکی، شرپ ءُ ازت ءُ کمک آنی رد ءَ انت۔ آئی ءَ گوشت کہ پاکستان ءُ چین ھمک رنگیں جیڈھ آنی گوما گر ءُ چیل بوھگ ءِ واتہ یک ءِ دومیگ ءِ گوما ھمگام ءَ اوشتاتگ ءُ آواں یک ءِ دومیگ ءِ گوما کمک کتگ۔ مزن وزیر شہباز شریف ءَ کراچی ناشرکاری ارش ءَ را مذمت گران ءَ گوشت کہ سرجمیں پاکستانی راج اے ناشرکاری ارش ءَ گران قیمتی جانی تاوان بار ءِ پد ءَ چین ءِ حکومت ءُ آماچیں ھاندان ءِ گوما گم ءَ ھم کچ ءَ شریک انت۔ آئی ءَ گوشت کہ کراچی ناشرکاری ارش ءِ سرجمیں پٹ ءُ پول، ایشی ءَ گوں دست مانجنیں مردم آناں زوت دزگیر کنگ ءُ سہرا کنگ بیت۔ 16 اپریل 2022 ءَ چینی مزن وزیر لی کی کیانگ ءِ گوما وتی گپ ءُ تران آنی ھوالگ ءَ دیان ءَ مزن وزیر ءَ گوشت کہ پاکستان ءَ جتا جتائیں منصوبگ ءُ دور ءُ باریگ ءَ کار کنوکیں توامیں چینی شہری آنی مزن تکی سیکورٹی ءَ را پکو کنگ ءَ را دل یکیمی جوڑ کنگ بہ بیت۔ چین ءِ ایکسٹرنل سیکورٹی کمشنر ءَ حکومت ءِ پاکستان ءِ نیمگ ءَ مزن وزیر ءَ را یک شلی ءَ نگرانی ءُ سروکی ءَ حکومت ءِ پاکستان ءِ نیمگ ءَ ناشرکاری ارش ءَ سرجمیں پٹ ءُ پول کنگ ءُ چینی شہری آنی رکھینگ ءِ گامگیج آناں ودینگ ءَ را ساڑات۔ آئی ءَ گوشت کہ ناشرکاری پاکستان ءُ چین ءِ یکجائی دژمن انت ءُ دوئیں نیمگ ءَ اے ھوپ ءَ چہ رکھگ ءُ ایشرا ھلاس کنگ ءِ جزم کتگ۔ آئی ءَ گوشت کہ پاکستان ءُ چین ءِ نیام ءَ ھم رنگیں جاور آنی تہ ءَ کمک، شریکداری، انچیں وھدے ءَ وھدیکہ میاں اوستمانی جاور باز نازرک ءُ لھم انت،ریاست آنی وت مہ وتی کمک ءِ جوانیں درور ءُ برجائی ءِ کوھنڈگ انت۔
