اسلام آباد۔ 19 مئی (اے پی پی) بنجائی وزیر حوالکاری و شینکاری مریم اورنگزیب یوم تکبیر آ ’’ نئے کاٹم ءِ شیف توریسن‘‘ نئے تورنہ‘‘ نا سرحال اس جاری کرسا پارینے کہ وزیراعظم شہباز شریف جوہری دھماکہ غاتا 24 سال پورو مننگ آ 10 دے ئی دود آتا اڈتننگ نا فیصلہ کرینے۔ پنچ شنبے نادے آ تینا بیان اٹی بنجائی وزیر حوالکاری پارے کہ وزیراعظم پارت کرینے کہ پاکستان نا جوڑ مننگ نا 75 سال پورو مننگ نا ڈائمنڈ جوبلی دود آتا وڑآ مچ آ ملک اٹی یوم تکبیر ءِ قومی جوزہ اٹ اڈتننگے۔ وزیراعظم بنجا، ہرچار آ صوبہ، آزاد جموں و کشمیر و گلگت بلتستان نا حکومت آتون اواری اٹ دود آتا اڈتننگ نا پارت کرینے۔ یوم تکبیر آ قومی دود اڈتننگ نا بنا19 مئی آن مریک۔ بنجائی وزیر حوالکاری پارے کہ 28 مئی 1998ء قومی افتخار و پاکستان نا تینا آجوئی، وتواجہی و قومی فائدہ غاتا خاطر وخت اس ہم کاٹم ءِ شیف توپننگ نا عظیم تاریخ نادے اسے۔ اوپارے کہ محمد نواز شریف نا کماشی ٹی پاکستان ءِ ایٹم نا خواجہ جوڑ کریسن، داسہ زرگزرانی واکدار اس جوڑ کینہ۔ دا ہمو تاریخی دے ءِ ہراتم قومی سرکڑدہ پیشن نا واکدارتا زور و دھڑکوتیان پد ہم وطن نا دفاع ءِ ناقابل تسخیر کننگ نا فیصلہ کرے و قوم انا کاٹم ءِ گمر اٹ بڑز کرے۔ اوپارے کہ بنجائی، صوبائی و ضلعی کہول آ یوم تکبیر نا دود اڈتننگک، تعلیمی ادارہ، طالب علم و ورناتے خاص وڑاٹ دادود آتا بشخ جوڑ کننگک۔ بنجائی وزیر حوالکاری پارے کہ وزیراعظم غٹ سیاسی جماعت ، وکیل، ڈاکٹر، میڈیا ، خواری کش ، سول سوسائٹی تنظیم تتون اوار راج انا غٹ تپہ غاتیان خواست کرینے کہ او دا قومی دے ءِ قومی جوزہ اٹ اڈ ایتر، دادے قوم انا بے مٹ سیوت، یکجہتی و پاکستان کن اسٹ مننگ نا دے ءِ، دادے آ ہمووڑاٹ اڈتننگ نا گرج ءِ۔ اومیڈیا غان خواست کرے کہ یوم تکبیر کن خصوصی نشریات، پروگرام و نوشت آتا بست وبند آن دا قومی دے انا دود آتیٹی تینا بشخ ءِ شاغے۔
