پولیو نا کیس آتا مون آ بننگ گڑتی اسے، مرض انا پورو چٹفنگ کن غٹ ءِ اواری اٹ پوسکن آ جوزہ اتون کاریم کننگ نا گرج ءِ، وزیراعظم شہباز شریف نا قومی ٹاسک فورس پولیو تور نا دیوان اٹی گپ وتران

اسلام آباد۔ 18 مئی (اے پی پی) وزیراعظم شہباز شریف پارینے کہ ملک اٹی پولیو نا ساڑی آ کیس آتا مون آ بننگ گڑتی اسے، بنجائی و صوبائی حکومت آتون اوار غٹ فریق آک پولیو نا چٹفنگ کن خواری و بھلو خذمت اس تسنو ، ولے پولیو نا چیلنج داسکان ساڑی ءِ ہرانا پورو چٹفنگ کن غٹ ءِ اواری اٹ کاریم کننگ نا گرج ءِ۔ وزیراعظم آفس نا میڈیا ونگ انا کنڈآن جاری بیان نا رداٹ داخیال آتا درشانی ءِ او چارشنبے نادے آ تینا کماشی ٹی قومی ٹاسک فورس پولیو تور انا دیوان اٹی گپ و تران کرسا کرے۔ دا ہلہلہ ئی دیوانءِ  وزیراعظم ملک اٹی ساڑی آ 3 پولیو کیس آتا رپورٹ مننگ آن پد بٹنگانے۔ دیوان اٹی پولیو تور نا بابت حکمت عملی آ سرجم حوال تننگا۔ دیوان اٹی بنجائی وزیر مریم اورنگزیب، عبدالقادر پٹیل، وزیراعلیٰ سندھ سید مراد علی شاہ ، وزیراعلیٰ پنجاب حمزہ شہباز(ویڈیو لنک)، وزیراعظم آزاد کشمیر سردار تنویر الیاس، وزیر جان جوڑی بلوچستان احسان شاہ، صوبائی وزیر جان جوڑی خیبرپختونخوا تیمور سلیم جھگڑا (ویڈیولنک)، صوبائی چیف سیکرٹریک و جہانی ادارہ غاتا نمائندہ غاک بشخ ہلکر۔ دیوان اٹی وزیراعظم پارے کہ ساڑی آ پولیو کیس آتا مون آ بننگ گڑتی اسے۔ غٹ اسٹیک ہولڈر آک بشمول بنجائی ادارہ، صوبائی حکومت آک و جہانی ادارہ غاک ملک آن پولیو نا چٹفنگ کن خواری کریر و بھلو خذمت اس تسر ولے پولیو نا چیلنج داسکان ساڑی ءِ، ہرانا چٹفنگ کن غٹ ءِ اواری اٹ کاریم کننگ نا گرج ءِ۔ اوپارے کہ بنجائی حکومت نا کنڈآن ہرممکن کمک و کمکاری نا باوری کرفیوہ۔ حکومت پاکستان جہانی ادارہ بشمول ورلڈ ہیلتھ آرگنائزیشن ، بل اینڈ ملینڈاگیٹس فاؤنڈیشن و ایلو ادارہ غاتا پولیو تور مہم کن تکنیکی و مالی امداد آ منت وار ءِ۔ دیوان اٹی حوال اٹی پاننگاکہ دا سال اپریل ومئی نا تُو تیٹی 3 پولیو کیس قطبی وزیرستان آن رپورٹ مس۔ فروری 2021 آن مارچ 2022 (14 تُو) اٹی ہچ ءُ پولیو کیس اس رپورٹ متنے۔ بلوچستان و خیبرپختونخوا نا 25 ضلع پولیو دین انا تالانی نا بابت ہائی رسک ءُ۔ وزیراعظم پارت کرے کہ غٹ صوبائی حکومت آک پولیو تور ہم آ پبی چکار تخر۔ وزیراعظم پارے کہ غٹ اسٹیک ہولڈر آتے اواری اٹ پولیو دین انا چٹفنگ کن پوسکن آ جوزہ و ولولہ اتون کاریم کننگ نا گرج ءِ ، جہانی پارٹنر آتون شریداری برجاسلک تانکہ پولیو نا پورو چٹفنگ ممکن مننگ کے۔ وزیراعظم شہباز شریف چناتے پولیو نا پڑی کنفسا انسداد پولیو مہم نا بناءِ کرے۔