اسلام آباد۔ 18 مئی (اے پی پی) بنجائی وزیر چاگڑدی بدلی سینیٹر شیری رحمان پارینے کہ موسمیاتی بدلی و اونا نتیجہ ٹی ترند انگا باسنی نا ریسہ، خشک سالی و نوکاپ کون آ حالیت آک چاگڑد نا بابت ننا رویہ غاتیٹی بدلی نا خواست ءِ کیرہ۔ داخیال آتا درشانی ءِ او چارشنبے نادے آ داڑے شہید ذوالفقار علی بھٹو انسٹی ٹیوٹ آف سائنس اینڈ ٹیکنالوجی (زیبسٹ) اسلام آباد نا سالانہ کانووکیشن نا دود آن تران کرسا کرے۔ اوپارے کہ ننا تعلیم نا ادارہ غاتے ننا آخبت نا تعین ءِ کروئی ءِ، طالب علم آک پاکستان نا آخبت ءُ، پگہ اوفتے ہی ملک انا کماشی ءِ کروئی ءِ۔ شیری رحمان پارے کہ ہمو کسر و شعبہ ءِ گچین کبو ہرانمے پرجوش کیک، لمہ و باوہ غاتیان خواست ءِ کہ تینا چناتے تینا کسر و کیریئر ءِ گچین کننگ کن ہلر۔ اوپارے کہ زالبول آتے کیریئر و زند اٹی تینا ہند ءِ دوئی کننگ کن خواری و مقابلہ کروئی مریک، مسن تے تعلیم دوئی کننگ نا کسر اٹ معذرت خواہ رویہ غاتے ہلوئی مریک۔ شیری رحمان طالب علم آتیا زور شاغا کہ نمے تینا راج و ملک اکن کڑد اداکروئی مریک۔ بنجائی وزیر موسمیاتی بدلی و اونا اثرآتا حوالہ ءِ ترسا پارے کہ چاگڑد نا رکھ و مون آدننگ کن پبی کوشست کننگے، پاکستان ءِ دیر انا کمتی، خشک سالی ، ہیٹ ویو و درجہ حرارت اٹی ودکی نا سوب آن گلیشیئرآتا دیر مننگ آن نوکاپ تون اوار ترند انگا موسمی حالیت و ایلو چاگڑدی ویل مون تروک ءِ۔ احتیاط کننگتو تو وار وار آ ہیٹ ویو برسا کیک۔ اوپارے کہ ڈغار ننے کلہو ایتک، ننے اودے بِننگ نا گرج ءِ۔
