اسلام آباد۔ 18 مئی (اے پی پی) بنجائی وزیر ڈٹ بندی ، شونداری اصلاحات و خصوصی گام گیج احسن اقبال پارینے کہ مسلم دنیا نا جہانی زرگزران اٹی بشخ 7 درسد ءِ ولے مسلم دنیا جہانی جنگ و جھیڑہ غاتیان غٹ آن زیات زہمی مسنے، جنگ انا برخلاف گام گیج آتا گرج ءِ، انت تعلیم، زرگزرانی نا آواری، سیاسی عمل نا بشخ مفننگ جھیڑہ نا سوب ءِ، پٹ وپول نا گرج ؟۔ داخیال آتا درشانی ءِ او چارشنبےنادے آ اولیکو انٹرنیشنل اسلامی کانفرنس آن تران کرسا کرے۔ بنجائی وزیر پارے کہ اسہ انسان اسے نا زند ءِ پُلنگ مچ آ انسانیت نا زند ءِ پُلنگ ءِ، اگہ کس اسے نا زند ءِ پُلنگ کس اسے نا ذہن اٹ شاغنگے تو اسلام تون /مذہب تون داکان بھلو زیادتی اس اف۔ اوپارے کہ اینو انتہاپسندی بیرہ مسلمان راج آتیٹی آخا بلکن مچ آ دنیا ٹی وڑاناوڑاسے ٹی ساڑی ءِ۔ اینو بھارت اٹی مسلمان تا زند ءِ تنک کننگانے، مسلمان زالبول آتے حجاب نا پن آ تنک کننگ انگ ءِ، بھارت اٹی مسلمان تا برخلاف تعصب نا است بڈی ءِ کننگ انگ ءِ۔ اوپارے کہ دنیا نا اسہ ڈیہہ سے ٹی جھیڑہ غان مچ آ دنیا زہمی مریک،روس یوکرین جھیڑہ نا درور مون آٹے ، خولم، پیٹرولیم و خور انا ات و در زہمی مننگ ءِ۔ اوپارے کہ مسلم دنیا نا جہانی زرگزران اٹ بشخ ہفت درسد ءِ ، ولے مسلم دنیا جہانی جھیڑہ غان غٹ آن زیات زہمی مسنے۔ او پارے کہ انتہاپسندی نا رویہ خار، تعصب نا رویہ ءِ ودی کیک، اینو امن ءِ زیات خطرہ سوشل میڈیا غان ءِ۔ انتہاپسندی ناکلہو آتے بے روک ٹوک شینک کننگ انگ ءِ۔ اوپارے کہ ہندن ءُ ہند جوڑ کننگ نا گرج ءِ ہراڑے ملک، اسلامی ملک آتا نیام اٹ پت انا فضاءِ جوڑ کننگ کے، ہندن ءُ حکمت عملی اس جوڑ کننگ نا گرج ءِ ہرا امن کن کمکار مننگ کے، گڑاس زمواراسلام نا دروشم ءِ مسخ کرینو وخت اس کہ اسل اٹ اسلام امن نا سبخ ایتک۔ اوپارے کہ اگہ امن مفک تو خواری نا بھرم ملنگ کپک، بدبختی اٹ اینو مسلمان جھیڑہ غاتا گواچی ءِ، خار ءِ چٹفنگ کن تین پہ تین ہمدردی ودی کیر۔ اوپارے کہ خار ءِ چٹفنگ و ویل آتا ایسر کننگ کن لٹ یا توفک آخا بلکن گپ وتران ءِ مون آ دروئی مریک۔
