اسلام آباد۔ 18 مئی (اے پی پی) وزیراعظم نا سلاہکار امور کشمیر و گلگت بلتستان قمر زمان کائرہ پارینے کہ بھارت یاسین ملک ءِ ظالمانہ عدالتی کارروائی نا کمک اٹ انتقام نا شست کننگ ءِ، بھارت نا ہر ریاستی ادارہ ہندوتوا نا سوچ آ عمل کننگ ءِ، بھارت کشمیری ورناتا سٹی آ آپریشن تا آڑاٹ عدالت آن ایڑتر خون ءِ کننگ ءِ۔ چارشنبے نادے آ تینا بیان اٹی قمر زمان کائرہ پارے کہ یاسین ملک ءِ اسہ وخت اسے آن تہاڑ زندان اٹی بند تخنگ آن پد ہم بھارت اونا عزم ءِ پرغنگ اٹ بے سہب مس، بھارت افضل گرو و مقبول بھٹ نا عدالتی خون ءِ کرے۔ قمر زمان کائرہ پارے کہ جہانی برادری و انسانی حق انا ادارہ غاک یاسین ملک نا برخلاف بھارتی ریاستی دہشت گردی ءِ تورفر، ہفت دہائی آن کشمیری تا برخلاف ظلم و جور انا غٹ چم آک بے سہب مسنو۔ قمر زمان کائرہ پارے کہ کشمیری تا جوزہ حریت اٹ اسہ انچ اسے نا ہم کمتی بتنے۔ غیرت مند و نرزور کشمیری ورناک بھارت آن تینا حق خودارادیت ءِ ہرحال اٹ ہلیرہ۔
