اسلام آباد۔ 18 مئی (اے پی پی) اپریل 2022 ء ٹی پیشن نا ملک رہینگوک پاکستانی تا کنڈآن ترسیلات زر انا وصولی 11.2 درسد ودانے۔ اسٹیٹ بینک آف پاکستان (ایس بی پی) نا رپورٹ نا رداٹ اپریل 2021 نا مقابلہ ٹی اپریل 2022 اٹی سمندر پار رہینگوک پاکستانی برادری نا کنڈآن مون تروک زر انا ہلنگ اٹی 11 درسد آن زیات ودکی نا نتیجہ ٹی ترسیلات زر انا کٹیاتا کچ 2.81 ارب ڈالر نا مقابلہ ٹی 3.12 ارب ڈالر اسکان ودا۔ ہندا وڑ مارچ 2022 نا مقابلہ ٹی اپریل 2022 اٹی ہم ترسیلات زر انا وصولی 11.9 دسد ودکی آن 2.79 ارب ڈالر نا مقابلہ ٹی 3.12 ارب ڈالر اسکان سرمس۔
