اسلام آباد۔17مئی (اے پی پی): بنجاھی وزیر آئی ٹی ءُ ٹیلی کمیونیکیشن سید امین الحق ءَ گوشت کہ گوستگیں سئے سال ءَ پاکستان ءَ انفارمیشن تیکنالوجی ءُ ٹیلی کام سیکٹر ءَ آشوبی گامگیج کنگ بوتگ۔ میاں اوستمانی ٹیلی کمیونیکیشن ءُ انفارمیشن سوسائٹی ڈی ءِ موہ ءَ بنجاھی وزیر آئی ٹی سید امین الحق ءَ وتی کلوہ ءَ گوشت کہ یکم جولائی 2018 ءَ بگر تاں 30 مارچ 2022 ءَ تاں ٹیلی کام انڈسٹری ءَ یک شل ءَ گیر ملکی سرمایہ کاری ءِ کساس 6 ارب 10 کروڑ ڈالر بوتگ، ٹیلی کام ءِ شوبگ ءَ گہتری کار آنی رد ءَ مارچ 2022 ءَ تاں ایکٹیو سمز آنی کساس 19 کروڑ 30 لکھ ءَ شتگ ءُ سر بوتگ، ملک ءَ موبائل ۓءُفکسڈ براڈ بینڈ یوزر آنی کساس 39 ٹک 4 درسد گیشی ءِ گوما 11 کروڑ ءَ چہ گیش بوتگ۔ بنجاھی وزیر سید امین الحق ءَ گوشت کہ وزارت آئی ٹی ءِ ادارگ یونیورسل سروس فنڈ ءِ وسیلگ ءَ سرجمیں ملک ءَ منصوبگ آنی بنگیج کتگ، جون 2021 ءَ تاں 31 ارب کلداسر ءَ چہ 37 ءَ چہ گیش منصوبگ بنداست کنگ بوتگ ایشانی تہ ءَ گیشتر آنی سر ءَ کار 50 درسد ءَ بگر تاں 75 درسد سرجم بوتگ۔
