اسلام آباد۔ 17 مئی (اے پی پی) وزیراعظم شہباز شریف چین پاکستان بے مٹ سنگتی نا اہمیت آ زور شاغسا پارینے کہ حکومت چینی کمپنی نا کنڈآن ناجوڑی تا تشخیص، بچفنگ و درمان کن جوائنٹ وینچر نا رداٹ زرکاری نا پیش کش نا ستاءِ کیک ، دا رداٹ حکومت ہر ممکن کمکاری فراوان کیک، وزیر جان جوڑی دا بارواٹ ٹاسک فورس اس جوڑ کے تانکہ ڈٹ آ زوت کاریم بناکننگ کے۔ وزیراعظم آفس میڈیا ونگ آن جاری بیان نا رداٹ سے شنبے نادے آ وزیراعظم شہباز شریف تون چینی کمپنی سینوویک نا ڈل اوڑدہی کرے۔ اوڑدہی ٹی کیانگ گواوجنرل مینجر سینوویک ، ڈائریکٹر انٹرنیشنل بزنس کیون زینگ، بنجائی وزیر جان جوڑی عبدالقادر پٹیل، ایگزیکٹیو ڈائریکٹر نیشنل انسٹیٹیوٹ آف ہیلتھ میجر جنرل پروفیسر عامر اکرام و تعلقدار بڑزکو کمامدارآک بشخ ہلکر۔ دیوان اٹی وزیراعظم ءِ کوویڈ۔ 19 ویکسی نیشن مہم اٹی سینوویک نا کنڈآن پاکستان ءِ تروک آ ویکسین نا بابت حوال تننگا۔ داکان بیدس سینوویک نا کنڈآن پاکستان اٹ زرکاری کرسا ناجوڑی تا تشخیص، بچفنگ و درمان کن اسہ جوائنٹ وینچر اس جوڑ کننگ اٹ است خواہی نا درشانی ءِ کننگا۔ وزیراعظم چین پاکستان بے مٹ سنگتی نا اہمیت آ زور شاغسا پارینے کہ حکومت چینی کمپنی نا کنڈآن زرکاری نا دا سلاہ نا ستا ءِ کیک و دا بابت ہروڑنا کمکاری فراوان کیک۔ وزیراعظم بنجائی وزیر جان جوڑی ءِ دا بابت دمدستی وڑاٹ اسہ ٹاسک فورس اس جوڑ کننگ نا پارت جاری کرے تانکہ سینو ویک کمپنی زوت دا ڈٹ آ کاریم نا بناءِ کننگ کے۔ وزیراعظم پارے کہ ملک اٹی براہ راست پیشن نا زرکاری ءِ ودفنگ حکومت نا اولیت آتیٹی اوار ءِ۔ پاکستان کوویڈ۔ 19 اٹی چینی کمکاری ءِ قدر انا نظراٹ ہرک۔
