پاکستان و سعودی عرب چندی علاقائی و جہانی امور آ ہم گرنچی تخرہ، صدر مملکت ڈاکٹر عارف علوی

اسلام آباد۔ 17 مئی (اے پی پی) صدر مملکت ڈاکٹر عارف علوی پارینے کہ پاکستان و سعودی عرب چندی علاقائی و جہانی امور آ ہم گرنچی تخرہ، ہڑتوم آ ملک آتا نیام اٹ چندی بشخ آتیٹی اسٹریٹجک و وسیع البنداو شریداری ءِ پین مون آ دننگ نا گرج ءِ۔ داخیال آتا درشانی ءِ او پاکستان اٹی سعودی عرب نا سفیر نواف بن سعید احمد المالکی تون گپ وتران کرسا کرے ہرا سے شنبے نادے آ داڑے ایوان صدر اٹی اوڑتون اوڑدہی کرے۔ اوڑدہی ٹی پاکستان و سعودی عرب نا نیام اٹ اسیجائی مذہب، اسیجائی قدر و دودوربیدگ آ مبنی دیرینہ برادرانہ تعلقداری تے پین سوگو کننگ نا است خواہی نا درشانی ءِ کننگا۔ صدر مملکت پارے کہ پاکستان سعودی عرب تون تینا تعلقداری تے بھاز اہمیت ایتک ہرامدام مشکل وخت اٹی پاکستان تون تفینے۔ اومستی پارے کہ ہڑتوم آ ملک آک چندی علاقائی و جہانی امور آ اسہ وڑ نا موقف تخرہ۔ اوہڑتوم آ ایلم ملک آتا تین پہ تینی فائدہ کن سعودی عرب تون چندی بشخ آتیٹی اسٹریٹجک و وسیع البنداو شریداری ءِ پین مون آ دننگ نا گرج آ زور شاغا۔ واپاری تعلقداری تے پین ودفنگ و ہڑتوم آ ملک آتا پوریا گر و چیمبرز آف کامرس ءِ تین پہ تینی واپاری تعلقداری تے پین مون آ دننگ کن باقاعدگی اٹ گپ وتران نا ترغیب تننگ آ زور شاغنگا۔ صدر مملکت پارے کہ سعودی عرب اٹی 20 لکھ آن زیات پاکستانی ہڑتوم آایلم ملک آتا شونداری و شونہالی ٹی اہم ءُ کڑد اس ادا کننگ ءُ۔ داوخت آ صدر مملکت خادم حرمین شریفین کن نیک است خواہی نا کلہو ہم تس و پارے کہ پاکستانی الس اوفتا گچین جان جوڑی وئی نا بھلنی کن دعا کیک۔