وزیراعظم شہباز شریف نا پارت، وزارت داخلہ نا مسکوہی وزیراعظم عمران خان نا فول پروف سیکورٹی ءِ پک کننگ نا گام گیج

اسلام آباد۔ 16 مئی (اے پی پی) وزیراعظم شہباز شریف نا کنڈآن مسکوہی وزیراعظم عمران خان نا فول پروف سیکورٹی ءِ پک کننگ نا پارت آ وزارت داخلہ پولیس و ایلو کانود نافذ کروک آ ادارہ غاتے مسکوہی وزیراعظم کن مقرر سیکورٹی فورس آتا تعیناتی آ پورو عملدرآمد کن پاننگانے۔ دوشنبے نادے آ وزارت داخلہ نا کنڈآن جاری بیان نا رداٹ مسکوہی وزیراعظم عمران خان نا بنی گالہ ہاؤس نا سیکورٹی کن پولیس و ایف سی نا 94 کارندہ تعینات کننگانے۔ اسلام آباد پولیس نا 22 وخت اس کہ ایف سی نا 72 کارندہ اوار ءُ۔ داکان بیدس خیبرپختونخوا پولیس نا کنڈآن 36، گلگت بلتستان پولیس نا 6 کارندہ غاتے ہم اونا تعلقدار حکومت آتا کنڈآن مسکوہی وزیراعظم نا سیکورٹی کن تعینات کننگانے۔ ایس ایم ایس سیکورٹی کمپنی نا 26 و عسکری سیکورٹی کمپنی نا 9 کارندہ ہم بنی گالہ ہاؤس نا سیکورٹی آ سلوک ءُ۔ مسکوہی وزیراعظم عمران خان نا دارالحکومت اسلام آباد آن پیشن موومنٹ اٹی اسلام آباد پولیس نا 4 گاڈی و 23 کارندہ وخت اس کہ رینجرنا اسہ گاڈی و 5 کارندہ غاتون ہروخت ساڑی مریرہ۔ وزارت داخلہ نا چاروکی ٹی تھریٹ اسیسمنٹ کمیٹی مسکوہی وزیراعظم عمران خان نا سیکورٹی نا بابت باندات آتا پدریسہ جاچ ءِ ہلنگ ءِ۔ وزیراعظم شہباز شریف ہم دا چرجوئی ٹی پیدوار پارت کرینے۔ وزارت داخلہ نا کنڈآن جاری بیان نا رداٹ مسکوہی وزیراعظم عمران خان تون اگہ خاص ءُ حوال اس ارے تو او اودے وزارت داخلہ تون ضرور شیئر کے تانکہ اوڑکن سیکورٹی نا پین بست وبند کننگ مرے۔ تدوک آ منہ دے آن مسکوہی وزیراعظم عمران خان السی مچی تیٹی تینا جان ءِ ممکنہ خلیس آتا بابت گڑتی نا درشانی ءِ کننگ ءِ۔ بطور مسکوہی وزیراعظم اونا زمواری ءِ کہ او تینا جان ءِ مون تروک ممکنہ خطرہ، سازش و ایلو باندات آتیان وزارت داخلہ و تعلقدار ادارہ غاتے معلومدار کے۔ وزارت داخلہ ، مسکوہی وزیراعظم عمران خان آن دوئی مروک معلومداری و شاہدی تے مون آ تخسا پین گام گیج کیک۔