صوبہ غاک یکم جون اسکان خولم ناہلنگ نا ہدف آتے پورو کیر، درآمد کروک آ خولم نا صوبہ غاتیٹی شفاف بشخنگ کن دمدستی کمیٹی اس جوڑ کننگے، وزیراعظم شہباز شریف

اسلام آباد۔ 16 مئی (اے پی پی) وزیراعظم شہباز شریف صوبہ غاتا کنڈآن خولم نا ہلنگ نا ہدف آتے پورو کپنگ آ ترندی نا درشانی ءِ کرسا پارینے کہ صوبہ غاک یکم جون اسکان خولم نا ہلنگ نا ہدف آتے دوئی کیر، پیشن آن درآمد کروک آ خولم نا صوبہ غاتیٹی شفاف بشخنگ کن دمدستی کمیٹی اس جوڑ کننگے۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم پارے کہ نیزگار الس نا خذمت اولی فرض ءِ۔ الس ءِ ہچ ءُ حالیت اسے ٹی مشکل اٹی شاغنگ مفک۔ بنجائی حکومت ہر حال اٹ کم نہاد آ نُت فراوان کیک، ڈیوالئی ءِ سگنگ مفک۔ وزیراعظم پارے کہ بنجائی حکومت سیاست آن ایڑتر مرسا خیبرپختونخوا حکومت نا ہم ہرممکن کمک ءِ کیک۔ وزیراعظم پارے کہ بنجائی حکومت ہرممکن کمک فراوان کننگ ءِ ، صوبہ غاک یکم جون اسکان خولم ہلنگ نا ہدف آتے پورو کیر۔ وزیراعظم بنجائی وزیر نیشنل فوڈ سیکورٹی ءِ پارت کرے کہ پیشن آن درآمد کروک آ خولم نا صوبہ غاتیٹی شفاف بشخنگ کن دمدستی کمیٹی اس جوڑ کننگے و گچین آب انا خولم درآمد ءِ پک کننگے۔