موسمیاتی بدلی نا اثرآتے کم کننگ، غذائی و دِیرانا کاختی آن بچنگ کن گام گیج، آبی کوڑی تا رکھ و جنگل آتا رکھ اکن جامع حکمت عملی اس مرتب کننگے، وزیراعظم نا پارت، موسمیاتی بدلی آ ٹاسک فورس اس جوڑ

اسلام آباد۔ 16 مئی (اے پی پی) وزیراعظم شہباز شریف پارت کرینے کہ موسمیاتی بدلی نا اثرآتے کم کننگ ، شسپر گلیشیئر واقعہ کون آ واقعہ غاتیان آخبت اٹ بچنگ، غذائی و دیر انا کاختی آن بچنگ کن گام گیج، دیر انا بچفنگ و ساڑی آبی کوڑی تا رکھ و جنگل آتا رکھ اکن جامع حکمت عملی اس مرتب کننگے، دیر انا بچفنگ کن السی آگاہی مہم اسے نا بناءِ کننگے، چولستان اٹی انسانی بستی و ساہدار تیکن دیر انا دمدستی فراوانی ءِ پک کننگے۔ وزیراعظم آفس نا میڈیا ونگ آن جاری بیان نا رداٹ اوداپارت ءِ تینا کماشی ٹی ساڑی آ باسنی نا ترند انگا ریسہ (ہیٹ ویو) و موسمیاتی بدلی نا ثرآتیا ہلہلہ ئی دیوان اٹی کرے۔ دیوان اٹی بنجائی وزیر سید خورشید احمد شاہ، شیری رحمان، احسان الرحمان مزاری، طارق بشیر چیمہ، مریم اورنگزیب ، چیئرمین این ڈی ایم اے لیفٹیننٹ جنرل اختر نواز و تعلقدار ادارہ غاتا آفیسر آک بشخ ہلکر۔ دیوان اٹی بنجائی وزیر تعلیم رانا تنویر حسین و صوبائی چیف سیکرٹریک ویڈیو لنک انا کمک اٹ بشخ ہلکر۔ وزیراعظم نا پارت آ موسمیاتی بدلی آ دمدستی وڑاٹ ٹاسک فورس اس جوڑ کننگانے۔ ٹاسک فورس اٹی تعلقدار بنجائی وزیرآک، سیکرٹریک، صوبائی چیف سیکرٹریک و تعلقدار صوبائی سیکرٹریک، چیئرمین این ڈی ایم اے و ایلو ادارہ غاتا بڑزکو آفیسر آک اوار ءُ۔ وزیراعظم پارت کرے کہ ٹاسک فورس ملک اٹی موسمیاتی بدلی نا اثرآتے کم کننگ، شسپر گلیشیئر واقعہ کون آ واقعہ غاتیان آخبت اٹ بچنگ، غذائی و دیر انا کاختی آن بچنگ کن گام گیج، دیر انا بچفنگ و ساڑی آ آبی کوڑی تا رکھ و جنگل آتا رکھ اکن جامع حکمت عملی اس مرتب کرسا دمدستی عملدرآمد کن گام گیج کے۔ ٹاسک فورس اینو دوشنبے نا بیگہ غا ہی تینا اولیکو دیوان اس اڈ ایتے و بروک آ دیوان اٹی رپورٹ پیش کے۔ دیوان ءِ ساڑی آ باسنی نا ترند انگا ریسہ نا بارواٹ سرجم وڑاٹ معلومدار کننگا۔ دیوان ءِ پاننگاکہ باسنی نا ترند انگا ریسہ نا بھلا سوب موسمیاتی بدلی ءِ۔ پاکستان موسمیاتی بدلی نا رداٹ مچ آ دنیا ٹی پنچ میکو نمبر آ غٹ آن زیات زہمی مننگ نا خطرہ غان دوچارملک ءِ۔ داکان بیدس پاکستان ءِ گلیشیئر نا بھلا کوڑی مننگ آن پد ہم دیر انا کمتی نا خطرہ ہم مون تروک ءِ۔داغٹ انا براہ راست پاکستان نا کشت وکشار آ مرتب مریک۔ وزیراعظم ہلہلہ ئی بنداو تیا دا بابت جامع حکمت عملی اس شین تننگ نا ہم پارت کرے۔ وزیراعظم پارے کہ دیر انا بچفنگ کن السی آگاہی مہم اسے نا بناءِ کننگے۔ وزیراعظم پارت کرے کہ پِر انا دیر ءِ کوڑی کننگ کن ہم بروک آ بشام آن مست دمدستی گام گیج آتے پک کننگے۔ وزیراعظم ءِ چولستان اٹی دیر انا کاختی آ ہم حوال تننگا۔ وزیراعظم پارت کرے کہ چولستان اٹی انسانی بستی و ساہدار تیکن دیر انا دمدستی فراوانی ءِ پک کننگے۔ ضلعی انتظامیہ و تعلقدار ادارہ غاک چولستان اٹی ساڑی آ باسنی نا ترند انگا ریسہ ٹی دمدستی کمکی سرجزآتے پک کیر۔ وزیراعظم چیئرمین این ڈی ایم اے ءِ دمدستی ہنزہ نا دورہ ءِ کننگ نا پارت کرے۔ ہنزہ ٹی شسپر گلیشیئر واقعہ ٹی تموک آ پول ءِ دمدستی تفنگے۔ وزیراعظم نا پول انا تفنگ آ پیش رفت ن ابابت بروک آ دیوان اٹی سرجم رپورٹ پیش کننگ نا ہم پارت کرے۔ وزیراعظم وزارت تعلیم ءِ سرکاری اسکول آتیٹی ساڑی آ باسنی نا ترند انگا ریسہ غان بچنگ کن ایس او پی تیا عملدرآمد و نجی اسکول آتے اوفتیا عملدرآمد کن پرمان جاری کننگ نا ہم پارت کرے۔ وزیراعظم نا وزارت جان جوڑی ءِ دمدستی وڑاٹ کوویڈ۔ 19 نا پوسکن آ سب ویرئینٹ نا بابت جاست وپاست و دانا ممکنہ اثرآتیا ہم سرجمی اٹ رپورٹ اس پیش کننگ نا پرمان کرے۔